Bandodkar Football Trophy: एफसी गोवा उपांत्य फेरीत! ब्रिस्बेन रोअरवर निर्णायक विजय

पणजी: सामन्याच्या पूर्वार्धात आर्मांद सादिकू याने नोंदविलेल्या निर्णायक गोलच्या बळावर एफसी गोवाने भाऊसाहेब बांदोडकर मेमोरियल ट्रॉफी फुटबॉल स्पर्धेत विजयी घोडदौड राखली. ऑस्ट्रेलियातील ब्रिस्बेन रोअरला नमवून गतविजेत्यांनी अ गटातून स्पर्धेची उपांत्य फेरीही निश्चित केली. सामना मंगळवारी रात्री फातोर्डा येथील पंडित जवाहरलाल नेहरू स्टेडियमवर झाला.

ब्रिस्बेन रोअरला उत्तरार्धात दहा खेळाडूंसह खेळावे लागले. त्यांच्या बेंजामिन हॅलोरन याला पूर्वार्ध संपण्यापूर्वी भरपाई वेळेतील पहिल्या मिनिटास थेट रेड कार्ड दाखविण्यात आले. त्यानंतर अल्बानियाच्या सादिकू याने स्पर्धेतील वैयक्तिक दुसरा गोल नोंदवत एफसी गोवाला ५१व्या मिनिटास आघाडी मिळवून दिली.

नंतर देयान द्राझिच याचा झंझावाती फटका ब्रिस्बेन रोअरचा गोलरक्षक मॅकलिन फ्रेक याने अप्रतिमपणे अडविल्यामुळे एफसी गोवाच्या खाती आणखी एका गोलची नोंद होऊ शकली नाही. एक खेळाडू कमी होऊनही पिछाडीनंतर ब्रिस्बेन रोअरने मुसंडी मारली, पण नशिबाची साथ लाभली नाही आणि एफसी गोवाची आघाडी अबाधित राहिली.

अगोदरच्या लढतीत स्पोर्टिंग क्लबला चार गोलने हरवलेल्या एफसी गोवाचे आता दोन लढतीतून गटात सर्वाधिक सहा गुण झाले आहेत. धेंपो क्लबला ५-१ फरकाने नमवलेल्या ब्रिस्बेन रोअरचे दोन लढतीतून तीन गुण कायम राहिले.