C K Nayudu Trophy: गोव्याच्या फिरकी गोलंदाजाचा भीमपराक्रम! 77 धावांत 11 गडी बाद; जम्मू काश्मीरचा दारुण पराभव

पणजी: लेगस्पिनर मनीष यादव याच्या जादुई फिरकीसमोर जम्मू-काश्मीरच्या २३ वर्षांखालील क्रिकेट संघाने सपशेल नमते घेतले, परिणामी गोव्याला कर्नल सी. के. नायडू करंडक एलिट अ गटात १४६ धावांनी दणदणीत विजय नोंदविता आला. जम्मू येथील हॉस्टेल मैदानावर झालेल्या लढतीत मनीषने दोन्ही डावांत मिळून ७७ धावांत ११ गडी बाद करण्याचा पराक्रम साधला.

चार दिवसीय सामना रविवारी तिसऱ्याच दिवशी संपला. एकूण २६६ धावांची आघाडी घेतल्यानंतर गोव्याने जम्मू-काश्मीरचा दुसरा डाव १२० धावांत गुंडाळला. मनीषने दुसऱ्या डावात अवघ्या २८ धावांत ५ गडी बाद केले. त्याने पहिल्या डावात ४९ धावांत ६ गडी टिपले होते.

अर्णव गुप्ता (५२) याचे अर्धशतक वगळता यजमान संघाचे इतर फलंदाज गोव्याच्या गोलंदाजांचा सामना करू शकले नाहीत. कर्णधार ऑफस्पिनर यश कसवणकर याने २६ धावांत ३, तर मध्यमगती समर्थ राणे याने ४० धावांत २ गडी बाद केले.

त्यापूर्वी, गोव्याने पहिल्या डावात ७४ धावांची आघाडी घेतल्यानंतर दुसऱ्या डावात १९२ धावा केल्या. पहिल्या डावात शानदार शतक केलेल्या शंतनू नेवगी याने दुसऱ्या डावातही चमकदार फलंदाजी केली. त्याने १२२ चेंडूंत आठ चौकारांच्या मदतीने ६४ धावा केल्या. जम्मू-काश्मीरच्या प्रफुल धर याने ५६ धावांत ६ गडी टिपले.

संक्षिप्त धावफलक

गोवा, पहिला डाव ः २८६

जम्मू-काश्मीर, पहिला डाव ः २१२

गोवा, दुसरा डाव (बिनबाद २४ वरून) ः ७१ षटकांत सर्वबाद १९२ (सार्थक भिके ३४, आदित्य कोटा ११, शंतनू नेवगी ६४, यश कसवणकर ५, कौशल हट्टंगडी ८, जीवनकुमार चित्तेम १०, दिशांक मिस्कीन नाबाद २०, अनुज यादव ३, मनीष काकोडे १९, समर्थ राणे ०, सुजय नाईक ०, प्रफुल धर १८-२-५३-६, सर्वाशिष सिंग २४-४-६६-३).

जम्मू-काश्मीर, दुसरा डाव ः ३०.१ षटकांत सर्वबाद १२० (अर्णव गुप्ता ५२, रिदम १८, बासित बशीर १८, यश कसवणकर ९-२-२६-३, समर्थ राणे ५-१-४०-२, मनीष काकोडे १०.१-२-२८-५, अनुज यादव ६-१-१८-०).

गोव्याला मिळाले १२ गुण

या सामन्यातून गोव्याला एकूण १२ गुण मिळाले. यामध्ये फलंदाजीत दोन, गोलंदाजीत चार, तर विजयाच्या सहा गुणांचा समावेश आहे. जम्मू-काश्मीरने फलंदाजी एक व गोलंदाजीत चार मिळून पाच गुण प्राप्त केले. गोव्याने सात सामन्यांतून एक विजय, चार पराभव, एक अनिर्णित व एक रद्द या कामगिरीसह एकूण ३८ गुणांची कमाई केली. जम्मू-काश्मीरचे सात लढतीतून एक विजय, चार पराभव व दोन अनिर्णित निकालासह ३८ गुण झाले. कोशंटवर जम्मू-काश्मीरला (०.७०२) सहावा, तर गोव्याला (०.६२१) सातवा क्रमांक मिळाला.