National Games 2025: फुटबॉल स्पर्धेचं वेळापत्रक जाहीर; कधी होणार गोव्याचा सामना, कोणत्या संघाशी करणार दोन हात? वाचा सविस्तर

38th National Games 2025

पणजी: उत्तराखंडमध्ये २९ जानेवारीपासून सुरू होणाऱ्या ३८व्या राष्ट्रीय क्रीडा स्पर्धेसाठी अखिल भारतीय फुटबॉल महासंघाने पुरुष व महिला फुटबॉल स्पर्धेतील गटवारी आणि वेळापत्रक जाहीर केले. पुरुष विभागात गोव्याचा अ गटात समावेश आहे.

पुरुष गटातील सामने ३० जानेवारीपासून, तर महिला गटातील सामने २९ जानेवारीपासून हल्दवानी येथे खेळले जातील. गोव्यात २०२३ साली झालेल्या ३७व्या राष्ट्रीय क्रीडा स्पर्धेत फुटबॉलमध्ये पुरुष गटात सेनादलाने, तर महिलांत ओडिशाने विजेतेपद मिळविले होते.

दोन्ही विभागात प्रत्येकी आठ संघ आहेत. यजमान उत्तराखंडचा अपवाद वगळता २०२३-२४ मधील संतोष करंडक राष्ट्रीय सीनियर पुरुष स्पर्धा आणि राजमाता जिजाबाई करंडक राष्ट्रीय सीनियर महिला स्पर्धेतील पहिल्या सात संघांची निवड करण्यात आली.

गोव्याचा स्पर्धेतील पहिला सामना ३० रोजी आसामविरुद्ध होईल, नंतर १ फेब्रुवारी रोजी मिझोरामविरुद्ध, तर ३ फेब्रुवारी रोजी उत्तराखंडविरुद्ध सामना होईल.

पुरुष विभागातील गटवारी

• अ गट - गोवा, उत्तराखंड, मिझोराम, आसाम,

• ब गट - सेनादल, केरळ, मणिपूर, दिल्ली.

महिला विभागातील गटवारी

• अ गट - हरियाना, तमिळनाडू, सिक्कीम, ओडिशा,

• ब गट : मणिपूर, दिल्ली, उत्तराखंड, पश्चिम बंगाल.