गोव्याचा मुख्यमंत्री कोण हे पक्षश्रेष्ठीच ठरवणार : विश्वजीत राणे

पणजी : गोव्यात सध्या मुख्यमंत्रीपदाचा पेच काही सुटता सुटेना असं चित्र आहे. विद्यमान मुख्यमंत्री सध्या काळजीवाहू मुख्यमंत्र्यांच्या भूमिकेत असले तरीही त्यांच्या मुख्यमंत्रीपदावर मात्र अनेकांची नजर आहे. गोव्यात मुख्यमंत्रीपदासाठी विश्वजीत राणेंचं आव्हान प्रमोद सावंतांना पेलावं लागणार आहे. अगदी कमी मतांच्या फरकाने निवडून आलेल्या प्रमोद सावंतांसमोर वाळपईत विरोधकांचा सुपडासाफ करणाऱ्या विश्वजीत राणेंचं तगडं आव्हान उभं आहे.

विधानसभा निवडणुकीचा (Goa Election) निकाल लागल्यानंतर विश्वजीत राणे हे सातत्याने भाजप नेत्यांच्या संपर्कात असल्याचं बोललं जात आहे. राणेंनी राजभवनावर जात राज्यपालांची भेटही घेतली होती, यामुळे गोव्याच्या राजकीय वर्तुळात चांगलीच चर्चा रंगली होती. आता विश्वजीत राणेंनी मुख्यमंत्रीपदाच्या वादावर पहिल्यांदाच भाष्य केलं आहे. भाजपच्या सर्व आमदारांमध्ये एकमत आहे. मात्र गोव्याचा पुढचा मुख्यमंत्री (CM) कोण होणार हे पक्षश्रेष्ठीच ठरवतील असंही विश्वजीत राणेंनी स्पष्ट केलं आहे.

भाजपचे (BJP) केंद्रीय निरीक्षक आज मंगळवारी गोव्यात दाखल होणार आहेत. पाचपैकी चार राज्यात भाजपला विजय मिळाल्याने सर्व राज्यांमध्ये एकाचवेळी सत्तास्थापनेचा दावा करण्याचा भाजपचा इरादा आहे. त्यामुळेच केंद्रीय निरीक्षकांच्या मार्गदर्शनाखाली पुढील रणनीती आखली जाणार आहे. दरम्यान जेनिफर मोन्सेरात यांच्यासह दिव्या राणे यांचं नावही मंत्रिपदाच्या शर्यतीत असल्याचं बोललं जात आहे. विश्वजीत राणे दिव्या राणेंच्या मंत्रिपदासाठी आग्रही असल्याचीही चर्चा सुरु आहे.