अपक्षांना येणार ‘सोन्याचे दिवस’

पणजी: भाजप आणि विरोधी काँग्रेसने सत्तेत येण्याचे दावे ठोकले असले, तरी दोन्ही पक्षांना बहुमत मिळणार नाही, असा अंदाज विविध माध्यमांच्या सर्वेक्षणावरून समोर आला आहे. त्यामुळे या दोन्ही पक्षांनी अपक्ष आणि छोट्या पक्षांच्या संभाव्य विजयी उमेदवारांवर लक्ष केंद्रित केले आहे.

यावेळच्या निवडणुकीमध्ये अपक्ष आमदार कमी प्रमाणात निवडून येतील, असा अंदाज व्यक्त केला जात होता. मात्र, सध्याची स्थिती उलटी आहे. राज्यात सात अपक्ष निवडून येतील असे अनुमान राजकीय वर्तुळातून व्यक्त होत आहे. त्यात प्रा. लक्ष्मीकांत पार्सेकर, उत्पल पर्रीकर, आंतोन वाझ, आलेक्स रेजिनाल्ड, सावित्री कवळेकर आणि डॉ. चंद्रकांत शेट्ये या नावांचा समावेश असून इजिदोर फर्नांडिस आणि विल्फ्रेड डिसा यांची नाव चर्चेत आहेत.

...तर मगोप ‘किंगमेकर’

मगोप २०१७ च्या निवडणुकीप्रमाणेच यंदाही चांगली कामगिरी करील अशी अपेक्षा आहे. या निवडणुकीत मगोपने तृणमूल काँग्रेसबरोबर युती करत १३ जागा लढवल्या. त्यापैकी ६ जागांवर त्यांनी विजयाचा दावा केला असून तृणमूलही काही जागा जिंकेल, असा अंदाज असून सत्ता स्थापनेत मगोप किंगमेकरची भूमिका बजावू शकतो. याशिवाय तृणमूल, राष्ट्रवादी आणि ‘आप’चे काही आमदार निवडून येण्याची शक्यता निर्माण झाली असून या पक्षांशीही काही नेते संपर्कात राहून पुढील मोर्चेबांधणी करत आहेत.

‘मॅजिक फिगर’साठी अपक्षांचा आधार

यावेळी सात पेक्षा जास्त अपक्षांनी आपणही निवडून येऊ शकतो, इतका भक्कम जनाधार मिळवला आहे. काँग्रेस आणि भाजपला सत्तेसाठीची ‘मॅजिक फिगर’ मिळवता आली नाही, तर इतरांची मदत घ्यावी लागणार आहे. यात प्रामुख्याने या अपक्षांचा समावेश असणार आहे. यावेळेला इतर राजकीय पक्षांबरोबर सहापेक्षा जास्त अपक्ष उमेदवार निवडून येतील असा अंदाज व्यक्त होत आहे. त्यामुळे सुरवातीपासूनच या अपक्षांशी भाजप आणि काँग्रेसने संपर्क सुरू ठेवल्याची माहिती आहे.