उमेदवारी अर्ज दाखल केल्यानंतर दिगंबर-बाबूमध्ये जुंपली

मडगाव : मडगावातून यापूर्वी सातवेळा निवडून आलेले मडगावचे आमदार दिगंबर कामत यांनी गुरुवारी आठव्यांदा उमेदवारी अर्ज भरला. यापूर्वी माझ्या विरोधात रथी महारथी उभे राहिले पण सर्वांना मडगावकरांनी घरी पाठविले. माझे काम मडगावकारांना माहित आहे. ते मला आठव्यांदा निवडून देतील, असा विश्वास त्यांनी व्यक्त केला. (Goa Elections News Updates)

माझे नाणे खणखणीत असताना मला दुसऱ्यावर डांबर फेकण्याची गरज नाही. मी मुख्यमंत्री (CM) असताना लोकांकडे असलेली सुबत्ता आणि या सरकारने लोकांच्या हातात आणून दिलेली करवंटी हे लोकांनी पाहिले आहे. त्यामुळे गोव्यात येणारे सरकार काँग्रेसचेच (Congress) असणार, असा दावा दिगंबर कामत यांनी केला.

दुसरीकडे भाजपचे बाबू आजगावकर यांनी आपला उमेदवारी अर्ज भरल्यावर पत्रकारांशी बोलताना, दिगंबर कामत (Digambar Kamat) यांनी मागच्या 27 वर्षात मडगावची वाट लावली. 1997 साली मी पेडणेत गेलो. माझ्या कारकिर्दीत तिथे विमानतळासह मोठमोठे प्रकल्प आले. दिगंबर कामत यांनी मागच्या 27 वर्षात मडगावात कोणते प्रकल्प आणले ते त्यांनी स्पष्ट करावे, असे थेट आव्हान दिले. यावेळी त्यांच्याबरोबर राज्यसभा खासदार विनय तेंडुलकर हेही होते. मडगावात बदल घडवून येणार आणि बाबू जायंट किलर ठरणार असा विश्वास यावेळी त्यांनी व्यक्त केला.