यंदाही मयेत भाजप गतवेळचाच ‘फॉर्म्युला’ वापरणार?

डिचोली (तुकाराम सावंत) : गेल्या काही दिवसांतील घडामोडी पाहता आगामी निवडणुकीसाठी मये मतदारसंघातून भाजपतर्फे गतवेळचा ''फॉर्म्युला'' अंमलात येणार असल्याचे आता स्पष्ट झाले आहे. विद्यमान आमदारांना डावलून भाजपचे उमेदवार म्हणून प्रेमेंद्र शेट यांचे नाव जवळपास निश्चित झाले असतानाच, आता उद्योजक मिलिंद पिळगावकर यांचे नाव चर्चेत येत आहे.

मिलिंद पिळगावकर हे गेल्या काही महिन्यांपासून भाजपच्या (BJP) संपर्कात आहेत. त्यातच दोनच दिवसांपूर्वी मये येथे झालेल्या महिला मेळाव्यात पिळगावकर यांनी आपणाला निवडून दिल्यास मयेत उद्योग प्रकल्प सुरू करतानाच महिलांना व्यासपीठ मिळवून देणार अशी ग्वाही दिली. त्यांच्या या वक्तव्यामुळे संभ्रम निर्माण झाला आहे. दुसऱ्या बाजूने विद्यमान आ.प्रवीण झांट्ये (Praveen Zantye) यांचा ''पत्ता'' कट करण्याच्या भाजपच्या खेळीमुळे मये मतदारसंघातील राजकीय समीकरणेही बदलतील असे संकेत आहेत. दरम्यान, मयेचे भाजप आमदार प्रवीण झांट्ये हे ''मगो'' (MGP) च्या वाटेवर असून, लवकरच ते मगो पक्षात प्रवेश करणार असल्याची माहिती सुत्रांनी दिली आहे.

गतवेळचा ‘फॉर्म्युला’

2017 साली भाजपने वेगळा फॉर्म्युला वापरला होता. मयेतून भाजप उमेदवारीवर सलग दोनदा निवडून आलेले तत्कालीन सभापती स्व.अनंत शेट यांना बाजूला करून प्रवीण झांट्ये यांना उमेदवारी दिली. भाजपची ती चाल यशस्वीही ठरली होती. येत्या निवडणुकीतही भाजपने गतवेळचा फॉर्म्युला वापरण्याचे निश्चित केले आहे. त्यासाठी विद्यमान आमदारांना डावलून प्रेमेंद्र शेट यांना भाजपची उमेदवारी देण्याचा विचार केला आहे. यावेळी हा फॉर्म्युला यशस्वी होणार की अंगलट येणार ते आगामी राजकीय समीकरणानंतर स्पष्ट होईल.