Goa Election 2022: काँग्रेस आणि भाजपा कार्यकर्त्यांकडून फटाक्यांचे बार

केपे: केपे मतदारसंघात यावेळी भाजपचे बाबू कवळेकर व काँग्रेसचे एल्टन डिकॉस्ता यांच्यात सरळ लढत होणार असल्याचे चित्र दिसत असून, संध्याकाळी काँग्रेस व भाजपा कार्यकर्त्यांनी फटाके वाजवून मतमोजणी पूर्वीच आपले विजय साजरे केले आहेत.

या मतदासरसंघातून झालेले मतदान पाहता लोकांनी या दोघांपैकी आपले मत कुणाच्या पारड्यात पाडले आहे ते येत्या 12 तारखेला दिसून येणार आहे. आज सकाळी साडेदहापर्यंत पालिका क्षेत्रातील मतदान केंद्रावर लोकांचा शुकशुकाट दिसून येत होता. तर हेच चित्र पंचायत क्षेत्रात उलट होते मतदार मोठ्या प्रमाणात बाहेर पडल्याने मतदान केंद्रात लोकांच्या रांगा लागून राहिल्याचे चित्र दिसत होते.

कवळेकर हे भाजपात (BJP) गेल्याने यावेळी त्यांना ही निवडणूक जड जाणार आल्याचे जे चित्र दिसत होते ते आज बऱ्याच प्रमाणात कवळेकर यांच्यासाठी बदललेले दिसत होते. संध्याकाळपर्यंत बरेच मतदार बाहेर पडल्याने मतदानाची टक्केवारी 83 टक्क्यांच्या वर गेल्याने ही टक्केवारी कुणासाठी फायदेशीर ठरणार याचा अंदाज येत नसल्याने सध्या हा केपेत चर्चेचा विषय ठरला आहे.