Volodymyr Zelenskyy: ब्रिटनच्या 900 वर्षे जुन्या वेस्टमिन्स्टर हॉलमध्ये झेलेन्स्की यांनी केले भाषण, जग ऐकतच राहिले...

Volodymyr Zelenskyy: युक्रेनचे राष्ट्राध्यक्ष व्लादिमीर झेलेन्स्की युद्धाला एक वर्ष पूर्ण होण्यापूर्वी ब्रिटनच्या दौऱ्यावर लंडनला पोहोचले आहेत.

तिथे त्यांनी ब्रिटनच्या 900 वर्षे जुन्या वेस्टमिन्स्टर हॉलमध्ये युक्रेनमधील युद्धाच्या परिस्थितीवर बोलण्यास सुरुवात केली, तेव्हा केवळ ब्रिटीश खासदारच नाही, तर संपूर्ण जग त्यांना ऐकत राहिले. (Russia-Ukraine war)

दरम्यान, ब्रिटिश खासदारांना संबोधित करताना झेलेन्स्की यांनी पहिल्या दिवसापासून रशियन आक्रमणाविरोधात पाठिंबा दिल्याबद्दल ब्रिटिश जनतेचे आभार मानले.

अधिक समर्थन मिळविण्यासाठी ते त्यांच्या देशाबाहेर प्रवास करत आहे. युक्रेनियन सैन्याचे आभार मानताना झेलेन्स्की म्हणाले की, “शूर सैनिकांच्या वतीने मी इथे आलो आहे.''

दुसरीकडे, लंडन (London) पहिल्या दिवसापासून कीवसोबत आहे. झेलेन्स्की यांचे भाषण ऐकण्यासाठी शेकडो खासदार आणि संसदीय कर्मचाऱ्यांनी 900 वर्षे जुना वेस्टमिन्स्टर हॉल खचाखच भरला होता.

जवळपास एक वर्षापूर्वी रशियाच्या (Russia) आक्रमणानंतर युक्रेनबाहेरचा हा त्यांचा दुसरा दौरा आहे. झेलेन्स्की यांनी डिसेंबरमध्ये अमेरिकेला भेट दिली होती.

पंतप्रधान ऋषी सुनक यांनी झेलेन्स्की यांना मिठी मारली

युक्रेनचे राष्ट्राध्यक्ष बुधवारी रॉयल एअर फोर्सच्या विमानाने लंडनला पोहोचले. ब्रिटनचे पंतप्रधान ऋषी सुनक यांनी त्यांचे स्वागत केले. झेलेन्स्की म्हणाले की, "युक्रेनच्या मदतीसाठी आलेल्या पहिल्या देशांपैकी ब्रिटन एक होता. आज मी लंडनमध्ये आहे. ब्रिटिश लोकांच्या पाठिंब्याबद्दल त्यांचे आभार मानायला हवेत."