America Strikes Qeshm Island: केशम बेटावरील स्फोटांनी हादरले इराण! मतदानाच्या दिवशीच अमेरिकेकडून लष्करी कारवाई; 'आत्मरक्षणासाठी' हल्ला केल्याचा दावा

America Strikes Qeshm Island: अमेरिका-इराण यांच्यातील संघर्षाच्या पार्श्वभूमीवर, अमेरिकन लष्कराने 'स्ट्रेट ऑफ होर्मुझ' या मोक्याच्या सागरी मार्गावरील इराणच्या काही लष्करी तळांवर जोरदार हल्ले केले. अमेरिकन अधिकाऱ्यांनी या लष्करी कारवाईची माहिती देताना हा केवळ एक 'संरक्षणात्मक' हल्ला असल्याचे स्पष्ट केले. इराणच्या 'केशम' बेटावर भीषण स्फोटांचे आवाज ऐकू आल्याच्या बातम्या इराणी माध्यमांनी दिल्यानंतर अमेरिकेकडून या हल्ल्याबाबत अधिकृत वक्तव्य आले.

विशेष म्हणजे, आज अमेरिकेत अत्यंत महत्त्वाच्या 'मध्यावधी निवडणुकांसाठी' मतदान पार पडत आहे. अशा महत्त्वाच्या दिवशीच इराणवर (Iran) झालेल्या या हल्ल्यामुळे मध्यपूर्वेत पुन्हा युद्ध पेटण्याची शक्यता वर्तवली जात आहे.

अमेरिकन प्रशासनातील एका उच्चपदस्थ अधिकाऱ्याने दिलेल्या माहितीनुसार, इराणी सैन्य अमेरिकन मालमत्तांना लक्ष्य करण्यासाठी जमिनीवरुन हवेत मारा करणाऱ्या क्षेपणास्त्रांचा वापर करत होते. अमेरिकन सैन्याने याच क्षेपणास्त्र यंत्रणांना आणि त्यांच्या तळांना अचूक निशाणा बनवून प्रत्युत्तराखल कारवाई केली. तथापि, मतदानाच्या अगदी काही तास आधी केलेल्या या लष्करी कारवाईमुळे ट्रम्प प्रशासनाच्या रणनीतीवर अनेक राजकीय प्रश्न उपस्थित केले जात आहेत. इराणसोबतचा संघर्ष वाढल्यास अमेरिकेत इंधनाचे दर गगनाला भिडतील, ज्याचा थेट फटका रिपब्लिकन पक्षाला निवडणुकीत बसू शकतो.

दुसऱ्या बाजूला, लष्करी हल्ले सुरु असतानाच अमेरिकेने संवाद साधण्याचा मार्गही खुला ठेवला. तर अमेरिकेचे उपराष्ट्राध्यक्ष जे. डी. व्हान्स यांनी इराणसोबत चर्चेच्या माध्यमातून कराराची शक्यता असल्याचे सूचक विधान केले. त्यांनी याप्रकरणी राष्ट्राध्यक्ष ट्रम्प यांच्याशी चर्चा केली असून, दोन्ही देश चर्चेद्वारे तोडगा काढू शकतात असे त्यांनी स्पष्ट केले. एका बाजूला युद्ध आणि दुसऱ्या बाजूला शांतता वार्ता, अशा ट्रम्प प्रशासनाच्या दुहेरी भूमिकेने संपूर्ण जगाचे लक्ष वेधून घेतले आहे.