US Travel Ban: अमेरिकेत प्रवेशबंदी! डोनाल्ड ट्रम्प यांचा नवा आदेश, 'या' देशांवरती निर्बंध; राष्ट्रीय सुरक्षेचे कारण केले पुढे

वॉशिंग्टन: अंदाजे डझनभर देशांतील नागरिकांना अमेरिकेत प्रवेशबंदी केली असल्याचे अध्यक्ष डोनाल्ड ट्रम्प यांनी जाहीर केले आहे. अफगाणिस्तान, बर्मा, काँगो, चाड, इक्वेटोरियल गिनी, एरिट्रिया, हैती, इराण, लीबिया, सोमालिया, सुदान, येमेन या देशातील नागरिकांना येत्या सोमवारपासून अमेरिकेत प्रवेशबंदी असेल, असे ट्रम्प यांनी जाहीर केले.

बुरुंडी, क्युबा, लाओस, सिएरा लियोन, टोगो, तुर्कमेनिस्तान, व्हेनेझुएला या देशातील नागरिकांवरही अधिक कठोर निर्बंध असतील, असे सांगण्यात आले. राष्ट्रीय सुरक्षेसाठी या देशातील नागरिकांवर बंदी घालण्यात येत असल्याचे अध्‌यक्षट्रम्प यांनी म्हटले आहे.

ही यादी २० जानेवारीला ट्रम्प यांनी जारी केलेल्या कार्यकारी आदेशानंतर तयार करण्यात आली आहे. या आदेशानुसार, परराष्ट्र विभाग, गृह मंत्रालय आणि राष्ट्रीय गुप्तचर संचालक यांनी अमेरिकेविषयी शत्रुत्वाची भावना असलेल्या देशांचा अहवाल तयार करावा.

तसेच त्या देशांतून येणाऱ्या व्यक्तींच्या प्रवेशामुळे राष्ट्रीय सुरक्षेला धोका निर्माण होतो का हे ठरवावे, असा आदेश होता. पहिल्या कार्यकाळात, जानेवारी २०१७ मध्ये ट्रम्प यांनी एक कार्यकारी आदेश जारी केला होता.