Ranil Wickremesinghe Warns: मला हुकुमशहा म्हणा... सरकारविरोधी आंदोलन लष्कराला बोलावून मोडून काढू

Ranil Wickremesinghe Warn: श्रीलंकेचे राष्ट्राध्यक्ष रानिल विक्रमसिंघे यांनी बुधवारी मुदतीपुर्वीच संसदीय निवडणूक घेण्याची विरोधी पक्षांची मागणी फेटाळली. मुदतीपुर्वी निवडणूक घेणार नाही, जर सत्ता बदलण्यासाठी नजीकच्या भविष्यात कुठल्याही प्रकारचे आंदोलन केले गेले, तर असे सरकारविरोधी आंदोलन लष्कर बोलावून मोडून काढले जाईल, असा इशाराच विक्रमसिंघे यांनी दिली.

(Sri Lankan Crisis)

विक्रमसिंघे बुधवारी संसदेत म्हणाले की, जोपर्यंत देशातील आर्थिक संकटावर उत्तर सापडत नाही, तोपर्यंत मी संसद बरखास्त करणार नाही. विक्रमसिंघे यांच्याकडे राजपक्षे यांचा उर्वरीत कार्यकाल पुर्ण करण्याचा जनादेश आहे. त्यांचा कार्यकाळ नोव्हेंबर 2024 पर्यंत असणार आहे. तथापि, विरोधी पक्ष लवकर निवडणूक घेण्याची मागणी करत आहेत. विक्रमसिंघे सरकाकडे निवडणुकीबाबतची विश्वासार्हता कमी आहे, त्यामुळे निवडणूक घ्यावी, अशी विरोधकांची मागणी आहे.

विक्रमसिंघे म्हणाले, आंदोलक खुशाल मला हुकुमशहा म्हणतो, पण पोलिसांच्या परवानगीशिवाय कोणतेही आंदोलन, निदर्शने करता येणार नाही. सरकारला सत्तेतून बेदखल करण्यासाठी आणखी एक सामुहिक आंदोलन करण्याची योजना आखली जात आहे. पण मी याला परवानगी देणार नाही. जर आंदोलकांनी पुन्हा प्रयत्न केला तर हे आंदोलन रोखण्यासाठी मी लष्कर बोलावेन आणि आणीबाणी कायद्याचा वापर करेन.

रस्त्यावरील आंदोलनांमागे फ्रंटलाइन सोशलिस्ट पार्टी नावाचा कट्टर राजकीय पक्ष आहे. त्यांना त्यांची राजकीय उद्दिष्टे साध्य करायची आहेत. आर्थिक संकटातून बाहेर पडण्यासाठी भारताने श्रीलंकेला 4 अब्ज डॉलरची मदत केली आहे, असेही त्यांनी सांगितले.

73 वर्षीय विक्रमसिंघे यांनी जुलैमध्ये राष्ट्राध्यक्षपदाचा पदभार स्विकारला हरोता. त्यापुर्वी तत्कालीन राष्ट्राध्यक्ष गोटबाया राजपक्षे हे आर्थिक संकटाच्या पार्श्वभुमीवर देशात झालेल्या लोकांच्या उद्रेकानंतर देश सोडून गेले होते.