युक्रेनी लष्कराकडून रशियाचे जहाज नष्ट

किव्ह: रशियाच्या युद्धनौकांनी थेट अझोव्हच्या समुद्रातून युक्रेनवर हल्ले करायला सुरूवात केल्यानंतर युक्रेननेही आज त्याला सडेतोड उत्तर दिले. रशियाचे एक लढाऊ जहाज युक्रेनच्या लष्कराने उद्‍ध्वस्त केले. ते मारिऊपोलपासून 45 मैल अंतरावर होते अशी माहिती सूत्रांनी दिली. राजधानी किव्हमधूनही रशियन लष्कराला जोरदार प्रतिकार होत असून रशियाने ताब्यात घेतलेला भूप्रदेश परत मिळविण्याच्या हालचाली युक्रेनकडून सुरू झाल्या आहेत. (Russia-Ukraine war News Updates)

मागील चार आठवड्यांपासून सुरू असलेल्या रशिया-युक्रेन संघर्षामध्ये रशियाचे सात ते पंधरा हजार सैनिक ठार झाले असल्याचा अंदाज ‘नाटो’कडून व्यक्त करण्यात आला आहे. रशियन आक्रमणाला युक्रेनमधून विरोध होऊ लागला असून या संघर्षाची जबरदस्त किंमत बलाढ्य अशा रशियन लष्कराला देखील मोजावी लागत आहे. तत्पूर्वी दहा वर्षे चाललेल्या अफगाणिस्तान युद्धामध्ये 15 हजार रशियन सैनिकांना प्राण गमवावे लागले होते. आता युक्रेनविरोधातील युद्धामध्ये मृत्युमुखी पडलेल्या रशियन सैनिकांचा आकडा वाढू लागल्याने पुतीन यांची नाचक्की होऊ लागली आहे. मारिऊपोलमधील रशियन हल्ल्यांची तीव्रता आणखी वाढली असून अनेक इमारती आणि रस्ते बॉम्ब हल्ल्यांमध्ये बेचिराख झाले आहेत.

रशियाचे नुकसान

सैनिक 15600

हेलिकॉप्टर 124

रणगाडे 517

लढाऊ विमाने 101

युद्धनौका 4

ड्रोन 42

मदत करणारी वाहने 1008

तोफा 267

मल्टिपल रॉकेट लाँचर 80