Pakistan News: पाकिस्तानी कलाकारने सादर केले भारतीय राष्ट्रगीत video

भारतीय स्वातंत्र्याचा अमृत महोत्सव देशात साजरा केला जात आहे. भारतीय स्वातंत्र्याची 75 वर्षे साजरी करत असताना देशात वेगळा उत्साह पहायला मिळत आहे. तसेच, देशाबाहेर असणारे भारतीय देखील आपले देश प्रेम दाखवत आहेत. दरम्यान, एका पाकिस्तानी कलाकाराने (Pakistani Artist) भारतीय राष्ट्रगीत (India's National Anthem) सादर केले असे जर तुम्हाला सागितले तर धक्का बसेल. पण, हे खरे आहे. भारतीय स्वातंत्र्याचा अमृत महोत्सवानिमित्त एका पाकिस्तानी कलाकाराने भारतीय राष्ट्रगीत सादर केले असून, त्याचा व्हिडिओ चांगलाच व्हायरल होत आहे.

सियाल खान (Siyal Khan) असे या कलाकाराचे नाव आहे, सियाल रबाब (Rabab) हे वाद्य वाजवतो. भारतीय स्वातंत्र्याचा अमृत महोत्सवानिमित्त सियाल खानने रबाब वरती भारतीय राष्ट्रगीत 'जण गण मन' सादर केले आहे. याचा व्हिडिओ सियाल याने ट्विटरवरती शेअर केला आहे. 'सीमापार असलेल्या चाहत्यांसाठी भेट. भारतीयांना स्वातंत्र्यदिनाच्या शुभेच्छा. मैत्री आणि शांततेचे प्रतिक म्हणून मी भारतीय राष्ट्रगीत सादर करत आहे. दोन्ही देशांमध्ये उत्तम संबधाची मी कामना करतो.' असे सियाल खान याने आपल्या ट्विटमध्ये म्हटले आहे.

सियाल खान याच्या व्हिडिओला हजारो व्हिव्हज मिळाल्या असून, अनेकांनी कमेंट देखील केली आहे. दरम्यान, भारतीय स्वातंत्र्यदिनाच्या एक दिवस अगोदर म्हणजेच, 14 ऑगस्ट रोजी पाकिस्तानचा स्वातंत्र्यदिन असतो. यावेळी देखील सियाल खान याने पाकिस्तानी राष्ट्रगीत सादर केले आहे.