Pakistan News: पाकिस्तानातील सिंधमध्ये रॉकेट लॉन्चरच्या शेलचा स्फोट होऊन 8 जणांचा मृत्यू झाला. कंधकोट जिल्ह्यात हा अपघात झाला. मृत्युमुखी पडलेल्यांमध्ये चार मुलांचाही समावेश असून, मृत्यूमुखी पडलेले सर्वजण एकाच कुटुंबातील आहेत.
काही जण गंभीर जखमी झाल्याचे सांगण्यात येत आहे. ज्यांना कंधकोट सिव्हिल हॉस्पिटलमध्ये दाखल करण्यात आले असून, त्यांच्यावर उपचार सुरु आहेत. जखमींपैकी काहींची प्रकृती चिंताजनक असल्याचे सांगण्यात येत आहे.
मिळालेल्या माहितीनुसार, मुले घरात रॉकेट लॉन्चरच्या शेलशी खेळत होती, त्यादरम्यान रॉकेटच्या शेलचा स्फोट झाला. या स्फोटात 8 जणांचा मृत्यू झाला. मृतांमध्ये चार मुले, दोन महिला आणि एका व्यक्तीचा समावेश आहे.
माहिती मिळताच पोलिसांनी (Police) घटनास्थळ गाठून सर्व जखमींना कंधकोट सिव्हिल हॉस्पिटलमध्ये दाखल केले. तसेच, मृतदेह पोस्टमॉर्टमसाठी रुग्णालयात नेण्यात आले.
कंधकोटचे वरिष्ठ पोलिस अधीक्षक रोहिल खोसा यांनी घटनेची माहिती दिली. त्यांनी सांगितले की, मुले बाहेर खेळत असताना त्यांना जमिनीवर रॉकेटचा शेल पडलेला दिसला. मुलांनी खेळण्यासाठी रॉकेटचे शेल घरी आणले आणि खेळायला सुरुवात केली.
दरम्यान, रॉकेटच्या शेलचा स्फोट होऊन घरामध्ये मोठा स्फोट झाला, या स्फोटात घरात उपस्थित 8 जणांचा मृत्यू झाला. त्यानंतर घरात गोंधळाचे वातावरण होते. या प्रकरणाचा तपास सुरु करण्यात आल्याचे पोलीस अधीक्षकांनी सांगितले.
रॉकेट शेलच्या स्फोटाची माहिती मिळताच सिंधचे काळजीवाहू मुख्यमंत्री मकबूल बकर यांनी या घटनेबद्दल शोक व्यक्त केला. मुख्यमंत्र्यांनी महानिरीक्षक डॉ. रिफत मुख्तार यांच्याकडून घटनेचा अहवाल मागवला आहे.
यासोबतच रॉकेट गावात कसे पोहोचले, या भागात शस्त्रास्त्रांची तस्करी होते का, गावात सध्या दहशतवाद्यांचे (Terrorists) समर्थक आहेत का, असे प्रश्न त्यांनी उपस्थित केले.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
