Nigeria: नायजेरियात पेट्रोलच्या टँकरचा स्फोट, 18 जणांचा मृत्यू; अनेक जखमी

नायजेरियातून एक धक्कादायक घटना समोर आली आहे. दक्षिण नायजेरियात पेट्रोल टँकरचा स्फोट होऊन 18 जणांचा मृत्यू झाला तर 10 जण गंभीर जखमी झाले. अधिकाऱ्यांनी ही माहिती दिली. नायजेरियाच्या फेडरल रोड सेफ्टी कॉर्प्सने शनिवारी संध्याकाळी एका निवेदनात म्हटले की, आग्नेय राज्यातील एनुगुमधील एनुगु-ओनित्शा एक्सप्रेसवेवर पेट्रोल वाहून नेणाऱ्या एका टँकरने नियंत्रण गमावले आणि 17 वाहनांना धडक दिली.

मृतांची ओळख पटवणे कठीण

सुरक्षा दलाच्या बचाव पथकाचे प्रवक्ते ओलुसेगुन ओगुंगबेमिडे यांनी सांगितले की, 'मृतांची ओळख पटवणे कठीण झाले आहे. 10 जखमींव्यतिरिक्त, बचाव कर्मचाऱ्यांनी इतर तिघांना सुरक्षित ठिकाणी पोहोचवले आहे.' नायजेरियातील बहुतेक प्रमुख रस्त्यांवर जीवघेणे ट्रक अपघात सामान्य आहेत. नायजेरिया हा आफ्रिकेतील सर्वात जास्त लोकसंख्या असलेला देश आहे.

काही दिवसांपूर्वीही एक धमाका झाला होता

या (जानेवारी) महिन्याच्या सुरुवातीला उत्तर-मध्य नायजेरियातील नायजर राज्यातील सुलेजा परिसरात असाच एक स्फोट झाला होता. जिथे पेट्रोल टँकरच्या स्फोटात 98 लोकांचा मृत्यू झाला होता. एका टाकीतून दुसऱ्या टाकीत पेट्रोल भरत असताना हा स्फोट झाला होता. त्यावेळी पेट्रोल काढण्यासाठी अनेक कामगार आणि इतर लोक घटनास्थळी उपस्थित होते.