Terror Attack: 'या' इस्लामिक देशात नरसंहार! 31 निष्पाप नागरिकांची गोळ्या झाडून हत्या; लष्करी राजवटीत हिंसाचाराचा उद्रेक

Niger Terror Attack: पश्चिम आफ्रिकेतील नायजर देश पुन्हा एकदा भीषण हिंसाचाराने हादरला. पश्चिम नायजरमधील तिल्लाबेरी परिसरातील गोरोउल गावावर अज्ञात बंदूकधाऱ्यांनी केलेल्या अमानुष हल्ल्यात 31 जणांचा मृत्यू झाला. या हल्ल्याची माहिती स्थानिक विद्यार्थी संघटना आणि प्रत्यक्षदर्शींनी दिली असून या घटनेमुळे संपूर्ण परिसरात भीतीचे वातावरण पसरले आहे. कायद्याची आणि मानवी जीवनाची तमा न बाळगणाऱ्या हल्लेखोरांनी हा कत्लेआम घडवून आणला, ज्यामध्ये अनेक घरे उद्ध्वस्त झाली आणि गावकरी रक्ताच्या थारोळ्यात पडले.

युनियन ऑफ नायजेरियन स्टुडंट्स आणि गोरोउलशी संबंधित इतर विद्यार्थी संघटनांनी जारी केलेल्या संयुक्त निवेदनात म्हटले की, या हल्ल्यात 31 जणांचा जागीच मृत्यू झाला असून 4 जण गंभीर जखमी झाले आहेत. जखमींना तातडीने जवळच्या रुग्णालयात दाखल करण्यात आले असून त्यांची प्रकृती चिंताजनक असल्याचे सांगण्यात येत आहे. विशेष म्हणजे, या हल्ल्याची जबाबदारी अद्याप कोणत्याही दहशतवादी (Terrorists) संघटनेने स्वीकारलेली नाही. मात्र, या भागात 'इस्लामिक स्टेट' शी संबंधित अनेक कट्टरपंथी गट सक्रिय असून ते वारंवार लष्कर आणि सामान्य नागरिकांना लक्ष्य करत असतात.

गोरोउल येथील रहिवासी हामिदौ अमादौ या प्रत्यक्षदर्शीने दिलेल्या माहितीनुसार, हा हल्ला अत्यंत भीषण होता. त्याने या नरसंहारासाठी 'इस्लामिक स्टेट इन ग्रेटर सहारा' (ISGS) या दहशतवादी संघटनेला जबाबदार धरले आहे. नायजरमध्ये (Niger) गेल्या काही वर्षांपासून इस्लामिक स्टेट आणि अल-कायदाशी संबंधित गट आपले पाय पसरवत आहेत. हे गट प्रामुख्याने सीमावर्ती भागातील गावांवर हल्ले करुन दहशत निर्माण करण्याचा प्रयत्न करतात. यापूर्वी, गेल्या वर्षी सप्टेंबर महिन्यातही तिल्लाबेरी भागातच दहशतवाद्यांनी सैनिकांवर हल्ला करुन 14 जवानांचा बळी घेतला होता.

नायजरमधील बिघडलेल्या सुरक्षा व्यवस्थेवर आता जागतिक स्तरावरुन चिंता व्यक्त केली जात आहे. 2023 मध्ये नायजरच्या सैन्याने लोकशाही मार्गाने निवडून आलेले सरकार उलथवून लावून सत्ता आपल्या हाती घेतली होती. त्यावेळी लष्करी सरकारने देशातील हिंसाचारावर नियंत्रण मिळवण्याचे आणि दहशतवादाचा नायनाट करण्याचे आश्वासन जनतेला दिले होते. मात्र, आकडेवारीनुसार लष्करी राजवट आल्यानंतर हल्ल्यांच्या संख्येत मोठी वाढ झाली आहे. लष्करी जनरल सलीफौ मोडी आणि वर्तमान सरकार हिंसाचार रोखण्यात अपयशी ठरल्याची टीका आता होत आहे. तिल्लाबेरी सारखे भाग, जे माली आणि बुर्किना फासोच्या सीमेला लागून आहेत, तिथे दहशतवाद्यांचे वर्चस्व वाढत चालले असून निष्पाप नागरिक या युद्धाचे बळी ठरत आहेत.