Mozambique Boat Accident: मोझांबिकमध्ये मोठा अपघात, बोट उलटल्याने 90 हून अधिक लोकांचा मृत्यू; बुडालेल्यांमध्ये लहान मुलांचाही समावेश!

Mozambique Boat Accident: मोझांबिकच्या उत्तर किनाऱ्यावर रविवारी एका बोटीचा अपघात झाला. बोट उलटल्याने मुलांसह 90 हून अधिक लोकांचा मृत्यू झाला. याबाबतची माहिती स्थानिक माध्यमांनी दिली आहे. स्थानिक ऑनलाइन प्रसारक टीव्ही डायरिओ नामपुलाने सांगितले की, या बोटीत क्षमतेपेक्षा जास्त लोक होते. बोटीमध्ये 130 लोक होते आणि बुडालेल्यांमध्ये अनेक मुले होती. ही बोट देशाच्या उत्तरेकडील नामपुला प्रांतातील लुंगा येथून मोझांबिक बेटाकडे जात असताना हा अपघात झाला. अजूनही अनेक लोक बेपत्ता आहेत. बचावकार्य युद्धपातळीवर सुरु आहे.

मासेमारीसाठी बोटीचा वापर केला जात होता

दरम्यान, काही जण जत्रेत सहभागी होण्यासाठी बोटीतून निघाले होते, तर काहीजण कॉलराचा संसर्ग टाळण्यासाठी लुंगा ते मोझांबिक बेटाकडे जाण्यासाठी निघाले होते, असे टीव्ही डायरिओ नामपुलाने वृत्त दिले आहे. नामपुला प्रांताचे राज्य सचिव जेम नेटोच्या हवाल्याने म्हटले आहे की, कथित कॉलराच्या संसर्गाबद्दल चुकीच्या माहितीचा प्रसार केला गेला. यामुळे लोक घाबरले आणि संसर्गाची लागण टाळण्यासाठी मोझांबिक बेटाकडे निघाले होते. अपघात झालेली बोट साधारणपणे मासेमारीसाठी वापरली जायची.

रस्त्याचे खराब नेटवर्क

मोझांबिक आणि त्याच्या शेजारील दक्षिण आफ्रिकन देश झिम्बाब्वे आणि मलावी हे अलीकडच्या काही महिन्यांत कॉलराच्या उद्रेकाने प्रभावित झाले आहेत. मोझांबिकमधील अनेक ठिकाणी फक्त बोटींनीच पोहोचता येते. या बोटी अनेकदा त्यांच्या क्षमतेपेक्षा जास्त लोक घेऊन जातात, ज्यामुळे अपघात होतात. परिस्थिती अशी आहे की, देशातील रस्त्यांचे नेटवर्क खराब आहे आणि काही भागात जमीन किंवा हवाई मार्गानेही पोहोचता येत नाही.