Congo Attack: काँगोमध्ये दहशतवादी हल्ला, चार हल्लेखोरांसह 14 जण ठार!

Congo Attack: आफ्रिकन देश काँगोमधील एका गावावर पुन्हा एकदा दहशतवादी हल्ला झाला. विद्रोही गटाच्या सैनिकांनी केलेल्या हल्ल्यात 14 जण ठार झाले. कांगो सैन्याने या हल्ल्याची पुष्टी केली आहे.

मीडिया रिपोर्ट्सनुसार, कर्नल मपेला मविनियामा यांनी सांगितले की, कोडको विद्रोही गटाचे काही सशस्त्र सैनिक रविवारी संध्याकाळी गोबू गावात घुसले होते.

यादरम्यान त्यांनी बेछूट गोळीबार केला. कांगो सैन्यानेही त्यांना प्रत्युत्तर दिले. यादरम्यान नऊ नागरिक, चार हल्लेखोर आणि एक सैनिक ठार झाला. त्याचवेळी, दोन सैनिक आणि दोन नागरिक जखमी झाले.

नायजेरियन सैन्यांवरही हल्ला

नुकतेच आफ्रिकन देश नायजेरियाच्या (Nigeria) उत्तरेकडील भागात लष्करावर दहशतवाद्यांनी हल्ला केला होता. या हल्ल्यात एक हेलिकॉप्टर कोसळल्याचे नायजेरियन लष्कराने सांगितले होते. यामुळे 36 नायजेरियन सैनिकांचा मृत्यू झाला होता.

संरक्षण प्रवक्ते मेजर जनरल एडवर्ड बुबा यांनी सांगितले की, सशस्त्र गटांनी आमच्या सैनिकांवर हल्ला केला आहे. या गोळीबारात लष्कराच्या तीन अधिकाऱ्यांसह 22 जवान शहीद झाले. तर सात जवान जखमी झाले.

ते पुढे म्हणाले की, मृत आणि जखमींना बाहेर काढण्यासाठी वायुसेनेचे हेलिकॉप्टर पाठवण्यात आले होते, पण ते देखील क्रॅश झाले आणि 14 इतर सैनिकांचा मृत्यू झाला.

नायजरमध्येही लष्करी उठाव

नायजेरियन सैन्यावर हल्ल्याच्या काही दिवस आधी शेजारच्या नायजरमध्ये लष्करी उठाव झाला होता. नायजरच्या लष्कराने असा दावा केला आहे की, त्यांनी राष्ट्राध्यक्ष मोहम्मद बजोम यांचे सरकार उलथून टाकले आहे.

त्यांनी अध्यक्ष बजोम यांना तुरुंगात टाकले आहे. UN-US च्या हस्तक्षेपावर आक्षेप घेत सैनिकांनी त्यांना धमकावले.

मिळालेल्या माहितीनुसार, सैनिकांनी नायजरच्या राष्ट्रीय वाहिनीवर सत्तापालटाची घोषणा केली. कर्नल अमादौ अब्द्रमाने आपल्या सहकारी सैनिक आणि अधिकाऱ्यांसोबत टीव्हीवर दिसले होते.

कर्नल अमादौ अब्द्रमाने सांगितले होते की, देशातील ढासळती सुरक्षा व्यवस्था आणि खराब प्रशासनामुळे आम्ही राष्ट्रपती राजवट संपवत आहोत.

नायजरच्या (Niger) सीमा सील केल्या आहेत. आता कोणीही देशाबाहेर जाऊ शकत नाही आणि बाहेरुन देशात कोणी येऊ शकत नाही. संपूर्ण देशात संचारबंदी आहे. सरकारी अधिकाऱ्यांना बडतर्फ करण्यात आले आहे.