Meta Layoffs: फेसबुकने दिला 11 हजार कर्मचाऱ्यांना नारळ

Meta Layoffs: एलन मस्क यांनी ट्विटरची सुत्रे हाती घेतल्यानंतर कंपनीतील अनेक कर्मचाऱ्यांना नुकतेच घरी घालवले आहे. त्यानंतर आता फेसबुकची पॅरेंट कंपनी असलेल्या मेटा कंपनीने तब्बल 11 हजार कर्मचाऱ्यांना नारळ दिला आहे. याबद्दल कंपनीचे सीईओ मार्क झुकेरबर्ग याबद्दल कर्मचाऱ्यांची माफी मागितली आहे.

कंपनीची आर्थिक स्थिती आणि ताज्या तिमाहितीली कंपनीचे निकाल पाहून तसेच डिजिटल महसुलामध्ये घट झाल्याने हा निर्णय घेण्यात आला आहे. मेटा प्लॅटफॉर्म्स इंक कंपनीने नवीन कर्मचारी भरती आधीच थांबवली आहे. त्यातच आता 11 हजारहून अधिक कर्मचाऱ्यांची कपात केली आहे. ही संख्या मेटामधील एकुण कर्मचाऱ्यांच्या 13 टक्के आहे.

याबद्दल बोलताना झुकेरबर्ग म्हणाले की, आम्ही या निर्णयाप्रत कसे आलो, याची संपुर्ण जबाबदारी माझी आहे. हा निर्णय सर्वांसाठीच कठिण होता. ज्या लोकांना याचा फटका बसला आहे, त्याबद्दल मला खेद वाटतो.

मेटा कंपनीच्या ज्या कर्मचाऱ्यांना कंपनीतून बाहेरचा रस्ता दाखवला गेला आहे, त्यांना 4 महिन्यांचा पगार दिला जाणार आहे. कंपनीचे मनुष्यबळ विभागाचे प्रमुख लॉरी गोलेर यांनी सांगितले की, नुकसान भरपाई म्हणून कर्मचाऱ्यांना 4 महिन्यांचा पगार दिला जाणार आहे.

मेटा कंपनीची सुरवात 2004 पासून फेसबुकपासून झाली आहे. कंपनीच्या 18 वर्षांच्या इतिहासातील ही सर्वात मोठी कर्मचारी कपात आहे. दरम्यान, याच वर्षात ट्विटरने त्यांच्या 50 टक्के कर्मचाऱ्यांची कपात केली आहे. स्नॅपचॅटनेही एकुण मनुष्यबळाच्या 20 टक्के कर्मचारी कपात करणार असल्याचे म्हटले आहे.