Kabul Blast: काबूलमध्ये नमाजच्या वेळी मशिदीत स्फोट, अनेकांचा मृत्यू

Kabul Blast: काबूल शहराच्या पश्चिमेकडील कोहाट-ए-सांगी येथे शुक्रवारच्या नमाजाच्या वेळी मशिदीत स्फोट झाला. प्राथमिक अहवालात अनेक लोक मृत आणि जखमी झाल्याचे सांगण्यात येत आहे. या स्फोटात किती लोक मारले गेले याची संपूर्ण माहिती अद्याप समोर आलेली नाही.

दरम्यान, 12 डिसेंबर रोजी अफगाणिस्तानची राजधानी काबूलमध्ये एका हॉटेलमध्ये आत्मघातकी बॉम्बस्फोट घडवून आणला होता. या हल्ल्यात 5 जण ठार झाले होते. तर इमर्जन्सी एनजीओच्या वतीने ट्विट करुन 21 जणांचा मृत्यू झाल्याचे सांगण्यात आले होते. विशेष म्हणजे, रुग्णालयात येण्यापूर्वीच तीन जणांचा मृत्यू झाला होता. मात्र, अद्याप याला अधिकृत दुजोरा मिळालेला नाही.

तसेच, अफगाणिस्तानमध्ये तालिबान (Taliban) या दहशतवादी संघटनेचे सरकार आहे, परंतु ISIS सारख्या भयानक दहशतवादी संघटनाही तिथे सक्रिय आहे, ज्यांना चीनबद्दल (China) प्रचंड द्वेष आहे.

महत्त्वाचे म्हणजे, ऑगस्ट 2021मध्ये अफगाणिस्तानातून अमेरिकन सैन्याच्या माघारीनंतर तिथे तालिबान राजवट आहे. तालिबान सातत्याने दावा करत आहे की, आम्ही देशात मजबूत सुरक्षा व्यवस्था पुनर्संचयित करण्याचा प्रयत्न करत आहोत. परंतु ते पूर्णपणे अपयशी ठरताना दिसत आहे. गेल्या काही महिन्यांपासून अफगाणिस्तानात अनेक ठिकाणी गोळीबार आणि स्फोटांची मालिका अव्याहतपणे सुरु आहे. ISIS या दहशतवादी संघटनेने यातील अनेक हल्ल्यांची जबाबदारी स्वीकारली आहे.