Indonesia Passenger Ship: इंडोनेशियात 240 प्रवाशांना घेऊन जाणारे जहाज बेपत्ता; वादळी हवामानामुळे संपर्क तुटल्याची भीती, बचावकार्य युद्धपातळीवर सुरु

Indonesia Missing Passenger Ship: इंडोनेशियाच्या सागरी हद्दीतून एक अत्यंत चिंताजनक आणि मोठी बातमी समोर येत आहे. बोर्नियो बेटाजवळ 240 प्रवाशांना घेऊन जाणारे एक मोठे प्रवासी जहाज अचानक बेपत्ता झाले. हे जहाज पूर्व जावा प्रांतातील सुराबाया या इंडोनेशियातील दुसऱ्या क्रमांकाच्या मोठ्या शहरातून दक्षिण कालीमंतन प्रांताची राजधानी बंजारमासिनकडे जात असताना जावा समुद्रात त्याचा अचानक संपर्क तुटला. जहाजाचा संपर्क तुटल्याचे समजताच इंडोनेशियाच्या बचाव पथकाने तातडीने जावा समुद्रात व्यापक शोध आणि बचाव मोहीम सुरु केली.

मिळालेल्या अधिकृत माहितीनुसार, 'वर्को ट्रान्सपोर्ट 8' असे या बेपत्ता झालेल्या जहाजाचे नाव आहे. जहाजाचे ऑपरेटर 'पीटी व्हर्गो योएल रिही' यांनी दिलेल्या माहितीनुसार, या जहाजाने शनिवारी स्थानिक वेळेनुसार सकाळी 10:13 वाजता सुराबाया बंदरातून बंजारमासिनसाठी प्रवास सुरु केला होता. मात्र, प्रवासादरम्यान जावा समुद्रात पोहोचल्यानंतर जहाजाची दळणवळण यंत्रणा पूर्णपणे ठप्प झाली आणि जहाजाशी असणारा संपर्क तुटला.

बंजारमासिन येथील सर्च अँड रेस्क्यू ऑफिसचे प्रमुख आय पुतू सुदायाना यांनी व्हिडिओ ब्रीफिंगमध्ये स्पष्ट केले की, जहाजाला प्रवासादरम्यान अचानक अत्यंत वाईट आणि वादळी हवामानाचा सामना करावा लागला. या खराब हवामानाची माहिती जहाजाच्या ऑपरेटरने तातडीने प्रशासनाला दिली, त्यानंतर काही वेळातच जहाजाचा संपर्क तुटला.

प्रारंभिक तपासात जहाजाचे शेवटचे लोकेशन जावा समुद्रात नोंदवले गेले असून, ते स्थान बंजारमासिन शहराच्या घाटापासून सुमारे 148 किलोमीटर अंतरावर आहे. जहाजाचा संपर्क तुटल्याचे स्पष्ट होताच बंजारमासिन येथील बसिरिह सर्च अँड रेस्क्यू पियरवरुन एका विशेष बचाव पथकाला तात्काळ पाचारण करण्यात आले. तसेच एक अत्याधुनिक बचाव जहाज 'वर्को ट्रान्सपोर्ट 8'च्या शेवटच्या संभाव्य लोकेशनच्या दिशेने रवाना करण्यात आले.

सुदैवाने, या दुर्घटनेत अद्याप कोणत्याही प्रकारची जीवितहानी किंवा जीवितहानी झाल्याची अधिकृत माहिती मिळालेली नाही. मात्र, 240 प्रवाशांचा जीव धोक्यात असल्याने संपूर्ण इंडोनेशियात चिंतेचे वातावरण पसरले आहे. बचाव पथके सध्या अत्यंत प्रतिकूल हवामानात समुद्राच्या लाटांशी सामना करत जहाजाचा शोध घेत आहेत.