बँक अकाउंट रिकामे करणारे 'फ्री फायर' तुम्हाला माहीतेयं का?

भारत सरकारने ज्या 54 चायनीज अ‍ॅप्सवर कात्री लावली आहे. ज्यात Garena फ्री फायर (Free Fire) या लोकप्रिय गेमचाही समावेश आहे. 2020 मध्ये जेव्हा PUBG वर देशात बंदी घातली गेली, तेव्हा त्याच्या डाउनलोडमध्ये 72% वाढ झाली होती. त्याच वेळी 2021 मध्ये ते सर्वाधिक डाउनलोड झाले होते. याच गेमने गेल्या दोन-तीन वर्षांत अनेकांची बँक खातीही रिकामी केली आहेत. हा गेम सिंगापूरस्थित (Singapore) गारेना सी कंपनीने विकसित केला आहे, परंतु तो चिनी अ‍ॅप्ससोबत जोडला गेला आहे. त्यामुळे या गेमवरही सरकारची कात्री चालली आहे. (Did You Know The Free Fire Game That Empties Bank Accounts)

दरम्यान, गृह मंत्रालयाने देशात 54 चायनीज अ‍ॅप्सवर बंदी घातली आहे. या प्रतिबंधित अ‍ॅप्समध्ये अ‍ॅपलॉक, ब्युटी कॅमेरा, व्हिवा व्हिडिओ एडिटर यांसारख्या लोकप्रिय अ‍ॅप्सचा देखील समावेश आहे. फ्री फायर म्हणजे काय? त्याच्या लोकप्रियतेचे कारण काय आहे? हा एक विनामूल्य गेम आहे, मग तुम्ही तो कसा मिळवाल? ते प्रसिद्धीच्या झोतात येण्याचे कारण काय? या या सर्व गोष्टी जाणून घेऊया...

तसेच, फ्री फायर हा एक फ्री-टू-प्ले बॅटल रॉयल गेम आहे, जो PUBG सारखा खेळला जातो. गेममध्ये प्रत्येक 10 मिनिटांनी तुम्हाला एका दुर्गम बेटावर सोडले जाते. इथे तुमच्या विरुद्ध 49 खेळाडू असतात. प्रत्येकाचे ध्येय फक्त जगणे हेच आहे. पॅराशूटच्या मदतीने खेळाडू त्यांना हवे तेथून सुरुवात करु शकतात. सर्व खेळाडू सुरक्षित क्षेत्रात राहण्याचे उद्दिष्ट ठेवतात. त्यांना हवाई हल्ल्यातून वाचावे लागते. त्याचबरोबर एवढा मोठा भाग एक्सप्लोर करण्यासाठी खेळाडू वाहने वापरु शकतात. ते संरक्षणखातर लपूही शकतात. इतर खेळाडूंना मारण्यासाठी, आपण लपलेले स्निपर वापरु शकता. खेळाडूला शस्त्रे शोधावी लागतात. प्लेझोनमध्ये राहण्यासाठी तुमच्या शत्रूंना लुटावे लागेल. जर खेळाडू लिजंडरी एअरड्रॉप चोरण्यात यशस्वी झाला तर त्याला इतर खेळाडूंपेक्षा जास्त फायदा होतो.

व्हिएतनाममधील गेमिंग स्टुडिओने विकसित केले

फ्री फायर 111 डॉट्स स्टुडिओने विकसित केले आहे. व्हिएतनाममधील हा एक छोटासा गेमिंग स्टुडिओ आहे. Garena हा Android आणि iOS प्लॅटफॉर्मसाठी गेमचा प्रकाशक आहे. ही कंपनी सिंगापूर आधारित गेम पब्लिशर आणि डेव्हलपर आहे. फ्री फायर गारेनाच्या मालकीची आहे. Garena ने 2017 मध्येच गेम आणि त्याचा डेव्हलपर खरेदी केला होता. नुकताच हा गेम Google Play Store आणि Apple App Store वरुन काढून टाकण्यात आला आहे. त्यानंतर अनेक फोनमध्ये काम करणे बंद झाले.

फ्री फायर कसे कमावते?

सहसा मोबाइल गेम्स किंवा प्स त्यांच्या प्लॅटफॉर्मवर जाहिराती दाखवतात. या जाहिरातींवर क्लिक केल्याने त्यांची कमाई होते. तथापि, बॅटल रॉयल गेम्स अपग्रेड केल्याने ते देखील कमावतात. उदाहरणार्थ, जर एखाद्या खेळाडूला चांगला पोशाख हवा असेल किंवा त्याला अत्याधुनिक शस्त्रे मिळवायची असतील, तर त्याला हे खरेदी करावी लागेल. बॅटल पास मूलत: कॅलेंडरप्रमाणे काम करतो, खेळाडूंना नवीन स्किन आणि कमावलेल्या XP च्या बदल्यात बोनस आयटम ऑफर करतो. खेळाडू 400 हिरे वापरुन इन-गेम स्टोअरमधून ते खरेदी करु शकतात.

शिवाय, ही गोष्ट अशा प्रकारे समजू शकते की, 89 रुपये खर्च केल्यास खेळाडूला 100 हिरे मिळतात. त्याच वेळी, 250 रुपयांच्या पॅकेजमध्ये 310 हिरे आहेत. त्यामुळे, बॅटल पास खरेदी करण्यासाठी त्याला 339 रुपये खर्च करावे लागतील, ज्यामुळे त्याला 410 हिरे मिळतील. उर्वरित हिरे स्वस्त वस्तू खरेदी करण्यासाठी वापरले जाऊ शकतात. हिरे जतन करुनही ठेवता येतात. फ्री फायरने एका दिवसात 7 कोटी कमावल्याचेही काही रिपोर्ट्समध्ये म्हटले आहे. म्हणजेच एका महिन्यात त्याची कमाई 210 कोटींच्या जवळपास होते. मात्र, कंपनीने याबाबत कोणतेही अधिकृत वक्तव्य दिलेले नाही.

फ्री फायरने अनेकांची खाती रिकामी केली

फ्री फायर हा गेम अपग्रेड करण्यासाठी किंवा शस्त्रे खरेदी करण्याच्या नादात त्यांचे लाखो रुपयांचे नुकसान झाले. गेल्या वर्षी मध्य प्रदेशातील (Madhya Pradesh) छतरपूरमध्ये राहणाऱ्या 13 वर्षीय कृष्णा पांडेचे गरेना फ्री फायरमध्ये 40 हजार रुपयांचे नुकसान झाले होते. या प्रकाराबद्दल मुलाच्या आईने त्याला खडसावले असता त्याने नैराश्येत जाऊन आत्महत्या केली.

अशाप्रकारे छत्तीसगडमधील (Chhattisgarh) कांकेरमधील एका मुलाने 3.22 लाख रुपयांची शस्त्रे खरेदी केली. मुलाने 3 महिन्यांत आईच्या बँक खात्यातून 278 व्यवहार केले.

तसेच, युपीतील 3 मुलांनी हा गेम खेळताना 11 लाखांहून अधिक किमतीची शस्त्रे खरेदी केली. या गेममध्ये पैसे गमावल्याची अनेक प्रकरणे समोर आली आहेत.