बल्गेरियात एका कंटेनर ट्रकमध्ये 18 अफगाण नागरिकांचे मृतदेह सापडले आहेत. मृतांमध्ये एका सात वर्षांच्या मुलाचाही समावेश आहे. बल्गेरियन सरकारने शुक्रवारी सांगितले की कंटेनरमध्ये सापडलेल्या 22 लोकांना गंभीर अवस्थेत रुग्णालयात दाखल करण्यात आले आहे.
ट्रकमध्ये एकूण 52 प्रवासी होते आणि त्यांना बेकायदेशीरपणे बल्गेरियात आणले जात होते.
बल्गेरियातील लोकोर्स्को गावाजवळ हे मृतदेह सापडले आहेत. स्थानिक लोकांनी पोलिसांना फोन करून अज्ञात ट्रक आल्याची माहिती दिली. पोलिस तेथे पोहोचले तेव्हा आजूबाजूला मृतदेह पडलेले दिसले. ट्रकमध्ये छोटे कंपार्टमेंट बनवून त्यात माणसे भरल्याचे तपासात समोर आले. बहुतेक लोकांचा मृत्यू गुदमरल्याने आणि उपासमारीने झाला. असे बल्गेरियाच्या आरोग्यमंत्र्यांनी म्हटले आहे.
न्यूयॉर्क पोस्टच्या वृत्तानुसार, बल्गेरियाची राजधानी सोफियापासून काही अंतरावर हा ट्रक सापडला आहे. ट्रकचा चालक लोकांना तिथेच तडफडत सोडून पळून गेला. ट्रकमधील लोकांसाठी बनवलेला डबा झाकला होता असे पोलिसांनी सांगितले.
डेप्युटी प्रॉसिक्युटर जनरल बोरिसलोव्ह यांनी सांगितले की ट्रक सापडण्याच्या 10 ते 12 तास आधीच या लोकांचा मृत्यू झाला होता. या प्रकरणी आतापर्यंत बल्गेरियातील 4 जणांना ताब्यात घेण्यात आले आहे.
मृत्यू झालेल्यांमध्ये 6 किंवा 7 वर्षांचा एक लहान मुलगा आहे. या घटनेत बचावलेले लोक थंडीने थरथर कापत होते. त्यांनी बरेच दिवस काही खाल्ले नाही, प्यालेले नव्हते. प्राथमिक माहितीनुसार, हा ट्रक अफगाणिस्तानातून निघाला होता, जो काही दिवसांपूर्वी तुर्कीमार्गे बल्गेरियाला पोहोचला होता.
दरम्यान, 2019 मध्ये ब्रिटनमध्ये एक ट्रक थांबवण्यात आला तेव्हा त्यात 39 लोकांचे मृतदेह सापडले होते. बेकायदेशीरपणे ब्रिटनमध्ये प्रवेश करण्याच्या प्रयत्नात या लोकांना आपला जीवही गमवावा लागला.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.