Bangladesh Hindu Protest: "प्रभू श्रीरामांच्या प्रतिमेवर बूट ठेवून केली विटंबना..."; इस्लामिक कट्टरपंथियांविरोधात बांगलादेशात हिंदूंचा महाआक्रोश VIDEO

Bangladesh Hindu Protest: बांगलादेशची राजधानी ढाका येथे राहणाऱ्या हिंदू समुदायाने मोठ्या प्रमाणावर रस्त्यावर उतरुन तीव्र निषेध नोंदवला. प्रभू श्रीरामांची जगातील सर्वात उंच मूर्ती बनवण्यास विरोध करणाऱ्या कट्टरपंथी इस्लामी संघटनांनी श्रीरामांच्या प्रतिमेचा कथित अपमान केल्यामुळे हा वाद उफाळला. या घटनेच्या निषेधार्थ हजारो हिंदू नागरिकांनी ढाका शहरात एकत्र येत आंदोलन केले. यावेळी संपूर्ण परिसर 'जय श्री राम' आणि इतर धार्मिक घोषणांनी हिंदू बांधवांनी दणाणून सोडला.

आंदोलनकर्त्यांनी प्रभू श्रीरामांचा आणि हिंदू धर्माचा अवमान करणाऱ्या दोषींना तात्काळ अटक करण्याची मागणी केली. बांगलादेशातील उत्तरी गैबांधा जिल्ह्यातील पलाशबाडी येथे प्रभू श्रीरामांच्या 81 फूट उंच मूर्तीच्या उभारणीला प्रशासनाने काही दिवसांपूर्वीच स्थगिती दिली, त्यानंतर हा संताप अधिक वाढला. या प्रकल्पासाठी काम करणाऱ्या 'श्री श्री राधा गोविंदा मंदिर समिती'ने दावा केला की, स्थानिक प्रशासनाला कट्टरपंथी इस्लामी गटांकडून सातत्याने धमक्या मिळत होत्या. या संपूर्ण प्रकरणाने मुस्लिम बहुल बांगलादेशात राहणाऱ्या अल्पसंख्याक हिंदूंच्या मानवी हक्कांबद्दल आणि सुरक्षेबद्दल पुन्हा एकदा जागतिक स्तरावर चिंता निर्माण केली.

आंदोलन करणाऱ्या हिंदू संघटनांनी आरोप केला की, नुकतेच एका हिंसक जमावाने प्रभू श्रीरामांच्या प्रतिमेवर बूट ठेवून तिची विटंबना केली, जी हिंदू धर्मभावनांची उघड क्रूर थट्टा आहे. हिंदू समाजाने प्रशासनाला 72 तासांचा कडक अल्टिमेटम दिला असून, या अपमानकारक कृत्यामागील मुख्य सूत्रधारांना वेळेत अटक न केल्यास येत्या रविवारी धार्मिक व्यवहार मंत्रालयाला एक अधिकृत निवेदन देऊन थेट जाब विचारण्यात येईल, असा इशारा दिला.

याशिवाय, आगामी काळात बांगलादेशच्या पंतप्रधानांसोबत विशेष बैठक घेणे, तसेच देशव्यापी मोर्चे आणि इतर निषेध कार्यक्रमांची मालिका सुरु करण्याची घोषणाही आंदोलकांनी केली.

मिळालेल्या माहितीनुसार, शुक्रवारी संध्याकाळी 5 वाजल्यापासून राजधानी ढाका येथील ऐतिहासिक शाहबाग चौकात हिंदू समुदायाच्या विविध सामाजिक आणि धार्मिक संघटनांचे कार्यकर्ते एकापाठोपाठ एक जमा झाले. यामध्ये ढाका येथील वेगवेगळ्या विद्यापीठांमधील हिंदू विद्यार्थ्यांचा मोठ्या संख्येने समावेश होता. हा मशाल मोर्चा शाहबाग चौकातून सुरु होऊन मोटेश्वर भवन मार्गे राष्ट्रीय प्रेस क्लबपर्यंत अत्यंत शिस्तबद्ध आणि तितक्याच आक्रमकपणे काढण्यात आला. प्रतिमेच्या अपमानाच्या निषेधार्थ शुक्रवारी सकाळी ढाका येथे दोन स्वतंत्र कार्यक्रमांचे आयोजनही करण्यात आले.

'हिंदू महाज्योत' नावाच्या संघटनेच्या दोन वेगवेगळ्या गटांनी दोन स्वतंत्र निषेध सभा घेतल्या. यातील एक कार्यक्रम राष्ट्रीय प्रेस क्लबसमोर मानवी साखळी तयार करुन करण्यात आला, तर दुसरा कार्यक्रम ढाका रिपोर्टर्स युनिटीमध्ये पत्रकार परिषदेच्या माध्यमातून पार पडला. बांगलादेशातील (Bangladesh) हिंदूंची ही एकजूट सध्या आंतरराष्ट्रीय माध्यमांमध्ये चर्चेचा विषय ठरली.