WTC Final Host Nation: भारताला पुन्हा डावललं, पुढील 3 'WTC Final'चं यजमानपद 'या' देशाकडे; ICC ची मोठी घोषणा

ICC Announces Host Countries for 2031 ICC Tournament

आंतरराष्ट्रीय क्रिकेट परिषदेने वर्ल्ड टेस्ट चॅम्पियनशिप व्यतिरिक्त अनेक आयसीसी स्पर्धांबद्दल मोठी अपडेट दिली आहे. आयसीसीने टी-२० वर्ल्ड कप आणि वनडे वर्ल्ड कपसाठी स्थळांची घोषणा केली आहे. आगामी ३ वर्ल्ड टेस्ट चॅम्पियनशिप एकाच देशाकडून आयोजित केल्या जातील, तर २०२७ च्या वनडे वर्ल्ड कपच्या आयोजनाची अधिकृत घोषणा देखील करण्यात आली आहे. आयसीसीने २०३१ पर्यंतचे मोठे वेळापत्रक जाहीर केले आहे.

भारत आणि श्रीलंका २०२६ मध्ये होणाऱ्या टी-२० विश्वचषकाचे आयोजन करतील. याशिवाय, इंग्लंडला आगामी तीन जागतिक कसोटी अजिंक्यपद स्पर्धेच्या अंतिम सामन्यांचे आयोजन करण्याची जबाबदारी देण्यात आली आहे.

२०२७ चा एकदिवसीय विश्वचषक दक्षिण आफ्रिका, झिम्बाब्वे आणि नामिबिया येथे खेळवला जाईल. २०२८ चा टी-२० विश्वचषक ऑस्ट्रेलिया आणि न्यूझीलंड येथे होणार आहे. २०२९ मध्ये भारत चॅम्पियन्स ट्रॉफीचे आयोजन करेल. २०३० मध्ये इंग्लंड, आयर्लंड आणि स्कॉटलंड टी-२० विश्वचषक आयोजित करतील. २०३१ मध्ये भारत आणि बांगलादेश एकदिवसीय विश्वचषक आयोजित करतील.

२०२१ मध्ये पहिल्यांदाच वर्ल्ड टेस्ट चॅम्पियनशिप फायनल सुरू झाली, त्यानंतर पहिल्यांदाच इंग्लंडने या सामन्याचे आयोजन केले. याशिवाय इंग्लंडने वर्ल्ड टेस्ट चॅम्पियनशिप २०२३ च्या फायनलचेही आयोजन केले.

त्याच वेळी, अलीकडेच इंग्लंडने वर्ल्ड टेस्ट चॅम्पियनशिप २०२५ च्या यजमानपदाची जबाबदारीही स्वीकारली. म्हणजेच आतापर्यंत इंग्लंडने ३ डब्ल्यूटीसी फायनलचे यजमानपद भूषवले आहे. याशिवाय, आगामी तीन डब्ल्यूटीसी फायनलचे यजमानपदही इंग्लंडकडे आहे.