India vs Pakistan: भारत-पाकिस्तान पुन्हा एकदा भिडणार; कधी अन् कुठे होणार सामना? एका क्लिकवर पाहा संपूर्ण वेळापत्रक

womens world cup 2025 india vs pakistan match date

आशिया कपमध्ये भारत आणि पाकिस्तानच्या पुरुष संघांमध्ये रंगलेल्या लढतींनी चाहत्यांना रोमांचित केले होते. भारताने या सामन्यांमध्ये प्रतिस्पर्ध्यावर मात करत आपली ताकद दाखवून दिली. आता चाहत्यांना पुन्हा एकदा भारत-पाकिस्तान सामना पाहायला मिळणार आहे, पण यावेळी महिला क्रिकेट विश्वचषकाच्या रंगभूमीवर.

महिला विश्वचषक

आयसीसी महिला क्रिकेट विश्वचषक ३० सप्टेंबरपासून भारत आणि श्रीलंका यांच्या संयुक्त विद्यमाने सुरू होत आहे. आठ देश या प्रतिष्ठित स्पर्धेत भाग घेणार असून भारत पहिल्यांदाच विश्वविजेतेपद पटकावण्याच्या उद्देशाने मैदानात उतरणार आहे. भारतीय संघाचे नेतृत्व हरमनप्रीत कौरकडे असून स्मृती मानधना उपकर्णधार आहे.

भारताचा पहिला सामना ३० सप्टेंबर रोजी गुवाहाटीमध्ये श्रीलंकेविरुद्ध होणार आहे. त्यानंतर ५ ऑक्टोबर रोजी कोलंबोमध्ये भारताचा सामना पाकिस्तानशी होणार आहे. हा सामना या स्पर्धेतील सर्वात जास्त चर्चेत असलेल्या सामन्यांपैकी एक ठरणार आहे. त्यानंतर भारत ९ ऑक्टोबरला दक्षिण आफ्रिकेशी, तसेच न्यूझीलंड, बांगलादेश आणि १२ ऑक्टोबरला ऑस्ट्रेलियाशी सामना खेळेल.

ऑस्ट्रेलियाचं वर्चस्व

महिला क्रिकेट विश्वचषकाची ही १३ वी आवृत्ती आहे. आतापर्यंत ऑस्ट्रेलियाने विक्रमी सात वेळा विजेतेपद मिळवले आहे. इंग्लंडने चार वेळा आणि न्यूझीलंडने एकदा हा किताब जिंकला आहे. सध्या ऑस्ट्रेलिया चॅम्पियन असून त्यांचा उद्देश विजेतेपद टिकवण्याचा असेल.

भारतीय संघाकडून यावेळी मोठ्या अपेक्षा आहेत. हरमनप्रीत कौर, स्मृती मानधना आणि अष्टपैलू दीप्ती शर्मा यांच्या कामगिरीवर चाहत्यांच्या नजरा असतील. याशिवाय जेमिमा रॉड्रिग्ज, रिचा घोष आणि रेणुका ठाकूर यांच्याकडूनही दमदार प्रदर्शनाची अपेक्षा आहे.

भारतीय महिला संघ:

हरमनप्रीत कौर (कर्णधार), स्मृती मानधना (उपकर्णधार), प्रतीक रावल, हरलीन देओल, जेमिमा रॉड्रिग्ज, रिचा घोष, यास्तिका भाटिया, रेणुका सिंग ठाकूर, दीप्ती शर्मा, स्नेह राणा, श्री चरणी, राधा यादव, अमनजोत कौर, अरुंधती रेड्डी, क्रांती गौर

पाकिस्तान महिला संघ:

फातिमा सना (कर्णधार), मुनीबा अली सिद्दीकी (उपकर्णधार), आलिया रियाझ, डायना बेग, आयमान फातिमा, नशरा सुंधू, नतालिया परवेझ, ओमामा सोहेल, रमीन शमीम, सदफ शमास, सादिया नवाझ, सिद्रा इक्बाल (यष्टीरक्षक), सय्यदा आरूब शाह

भारत-पाकिस्तान सामन्याची उत्सुकता शिगेला

५ ऑक्टोबरला होणाऱ्या या सामन्याकडे सर्वांचे लक्ष लागले आहे. पुरुषांच्या स्पर्धेत भारताने तीनही वेळा पाकिस्तानवर विजय मिळवला होता. महिला संघही हाच वारसा पुढे नेतो का, हे पाहणे रोचक ठरणार आहे.