पियुष जैनच्या घरातून 64 किलो सोन्यासह 600 लिटर चंदन तेल जप्त

उत्तर प्रदेशातील (Uttar Pradesh) व्यापारी पियुष जैन यांच्या कानपूर येथील घरातून 177 कोटी रुपये जप्त करण्यात आले आहेत. तेव्हापासून अधिक तपास सुरू आहे. यांच्या कन्नौज येथील घरावर छापे टाकताना 194 कोटींची रोकडही मिळाली आहे. या प्रकरणात या व्यावसायिकाकडून सरकारी (Government) आकड्यांमध्ये वार्षिक केवळ 5 कोटींची उलाढाल दाखवण्यात आली असली तरी वसूल केलेली रक्कम शेकडो कोटींची असल्याचा खुलासाही करण्यात आला आहे. आता पियुष जैन न्यायालयीन कोठडीत असून प्रकरण न्यायालयात (Court) आहे. या अवैध कमाईच्या मुळापर्यंत जाण्यासाठी अनेक तपास यंत्रणा कसरत करत आहेत.

पियुष जैनच्या घरात काय काय सापडले?

GST इंटेलिजेंस डायरेक्टरेट जनरल (DGGI) अहमदाबादच्या टीमने गुरुवारी कानपूर येथील निवासस्थानावर छापा टाकला. यानंतर कन्नौज येथील निवासस्थानावर छापे टाकण्यात आले. तपास यंत्रणा गेल्या पाच दिवसांपासून नोट मोजणी यंत्राद्वारे रोख रक्कम मोजण्यात व्यस्त आहेत. घराच्या भिंती, छत, कपाट आणि तळघरातून बंपर रोकड सापडली आहे. कानपूरमधून 177 कोटी रुपये आणि कन्नौजमधून 17 कोटी रुपयांची रोकड जप्त करण्यात आली आहे. यासोबतच 64 किलो सोने, सुमारे 250 किलो चांदी आणि 600 लिटर चंदन तेल जप्त करण्यात आले आहे.