मुलींना मारहाण केल्याप्रकरणी दिल्ली महिला आयोगाची कारवाई, पोलिसांकडे मागितला रिपोर्ट

Delhi Commission For Women: दिल्लीत ट्यूशन शिक्षकाने दोन मुलींना बेदम मारहाण केल्याची घटना समोर आली आहे. ही घटना दिल्लीतील भालसवा डेअरी भागातील आहे. आता या घटनेत दिल्ली महिला आयोगाने दिल्ली पोलिसांना नोटीस बजावून अहवाल मागवला आहे. पीडित मुलींच्या वडिलांनी दिल्ली महिला आयोगाला सांगितले की, 'माझ्या दोन मुली शेजारच्या एका शिक्षकाकडून ट्यूशन घेतात. 31 ऑगस्ट रोजी संध्याकाळी दोघीही ट्यूशनवरुन घरी आल्या तेव्हा त्यांनी मला सांगितले की, आज सरांनी आम्हाला खूप मारहाण केली आहे. असे म्हणत त्या रडू लागल्या.'

मुलींच्या वडिलांनी पुढे सांगितले की, 'यादरम्यान एक मुलगीही बेशुद्ध झाली. मारहाणीचे कारण मी पुन्हा विचारले असता, गृहपाठ पूर्ण न केल्याने आम्हाला बेदम मारहाण करण्यात आल्याचे त्यांनी सांगितले. मुलींनी पुढे सांगितले की, सरांनी आम्हाला एका खोलीत बंद केले आणि प्लास्टिकच्या पाईपने बेदम मारहाण केली.'

दुसरीकडे, हे प्रकरण समोर आल्यानंतर महिला आयोगाने दखल घेत दिल्ली पोलिसांना नोटीस बजावून याप्रकरणी केलेल्या कारवाईचा अहवाल मागवला. आयोगाने आरोपींच्या अटकेच्या स्थितीसह एफआयआरची प्रत मागितली आहे. आयोगाने दिल्ली पोलिसांना (Delhi Police) या प्रकरणी केलेल्या कारवाईचा अहवाल 6 सप्टेंबरपर्यंत देण्यास सांगितले आहे.

तसेच, या प्रकरणाबाबत दिल्ली महिला आयोगाच्या अध्यक्षा स्वाती मालीवाल म्हणाल्या की, 'ही एक भयंकर घटना आहे. एखादा शिक्षक या लहान मुलींना एवढ्या निर्दयीपणे कसा मारहाण करु शकतो? या प्रकरणाची चौकशी करुन आरोपींना अटक करावी. याप्रकरणी कठोर कारवाई करावी.'