Supreme Court Udhayanidhi Stalin: सनातन धर्माबाबत भाष्य केल्याबद्दल तामिळनाडूचे मुख्यमंत्री एमके स्टॅलिन यांचे पुत्र उदयनिधी यांना सर्वोच्च न्यायालयाने फटकारले आहे. तुम्ही मंत्री आहात आणि त्याचे परिणाम तुम्हाला कळायला हवेत, असे न्यायालयाने म्हटले आहे. उदयनिधी हे तामिळनाडूतील सत्ताधारी द्रमुक सरकारमध्ये मंत्रीही आहेत. गेल्या वर्षी सप्टेंबरमध्ये त्यांनी सनातन धर्माची तुलना करोना आणि मलेरियासारख्या आजारांशी केली होती.
वास्तविक, उदयनिधी यांनी सनातन धर्माबाबत केलेल्या वक्तव्यामुळे त्यांच्यावर नोंदवलेल्या एफआयआर क्लब करण्यासाठी सर्वोच्च न्यायालयात (Supreme Court) धाव घेतली होती. सुनावणीदरम्यान न्यायालय म्हणाले की, ''तुम्ही तुमच्या अधिकारांचा गैरवापर केला आहे... तुम्ही काय वक्तव्य केलं ते तुम्हाला माहीत आहे. तुम्हाला परिणामांची जाणीव असायला हवी. तुम्ही मंत्री आहात, सामान्य व्यक्ती नाही.''
स्टॅलिन यांच्या वतीने न्यायालयात हजर झालेले अधिवक्ता अभिषेक मनू सिंघवी यांचे म्हणणे आहे की, ते वक्तव्य समर्थन करत नाही. स्टॅलिन यांच्या विरोधात 6 राज्यांमध्ये एफआयआर नोंदवले गेले आहेत आणि ते क्लब करण्याचे आवाहन त्यांनी केले. यावेळी न्यायालयाने त्यांना संबंधित उच्च न्यायालयात जाण्यास सांगितले. सिंघवी पुढे म्हणाले की, 'मला 6 उच्च न्यायालयात जावे लागेल. यातच मी गुंतून राहील... खटला चालण्याआधीच हा त्रास सुरु होईल.'
सुनावणीदरम्यान सिंघवी यांनी पत्रकार अर्णब गोस्वामी, अमिश देवगण, भारतीय जनता पक्षाच्या नेत्या नुपूर शर्मा आणि मोहम्मद जुबेर यांच्याशी संबंधित प्रकरणांचा वारंवार उल्लेख केला. सिंघवी यांनी वारंवार विनंती केल्यानंतर न्यायालयाने याचिकेवर विचार करण्याचे मान्य केले. या प्रकरणाची पुढील सुनावणी शुक्रवारी होणार असल्याचेही सांगण्यात आले आहे.
गेल्या वर्षी 2 सप्टेंबर रोजी उदयनिधी म्हणाले होते की, ''काही गोष्टी आहेत, ज्यांचे आपल्याला समूळ उच्चाटन करावे लागेल. आपण त्या गोष्टींना फक्त विरोध करु शकत नाही. डास, डेंग्यू, कोरोना (Corona) आणि मलेरिया यांचा फक्त विरोध करुन चालणार नाहीतर त्याचे समूळ उच्चाटन केले पाहिजे. सनातन बाबतही असेच केले पाहिजे, त्याचा विरोध करुन चालणार नाहीतर त्याचे समूळ उच्चाटन करणे हे आपले पहिले काम असले पाहिजे.''
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
