Rajasthan Crime: राजस्थानच्या जोधपूरमध्ये एका 17 वर्षीय दलित मुलीवर तीन जणांनी सामूहिक बलात्कार केल्याची घटना समोर आली आहे. ही घटना रविवारी सकाळी घडली. दलित तरुणी तिच्या प्रियकरासोबत जोधपूरला पोहोचली होती, तिथे आरोपींनी तिला मदत करण्याच्या बहाण्याने सोबत नेले.
घटनास्थळी पोहचल्यानंतर आधी प्रियकराला या नराधमांनी मारहाण केली आणि नंतर एकामागून एक मुलीवर बलात्कार केला. पोलिसांना या घटनेची माहिती मिळताच काही तासांतच आरोपींना ताब्यात घेण्यात आले.
पोलिसांनी (Police) दिलेल्या माहितीनुसार, तिन्ही आरोपी आरएसएसच्या विद्यार्थी संघटनेच्या म्हणजेच अभाविपच्या विद्यार्थी संघटनेच्या निवडणुकीसाठी प्रचार करत होते. मात्र, एबीव्हीपीने आरोपींशी कोणताही संबंध नसल्याचे स्पष्ट केले आहे.
त्याचबरोबर, या संपूर्ण प्रकरणावरुन राजकारणही चांगलेच तापले आहे. या संपूर्ण प्रकरणी राज्याचे मुख्यमंत्री अशोक गेहलोत यांनी डीजीपी उमेश मिश्रा यांच्याशी चर्चा केली आहे. त्यांच्या गृहजिल्ह्यात असा गुन्हा घडल्यानंतर सीएम गेहलोत यांनी डीजीपीशी बोलून आरोपींवर कडक कारवाई करण्यास सांगितले.
सीएम गेहलोत म्हणाले की, पोलिसांनी ज्या तत्परतेने आरोपींना अटक केली ती वाखाणण्याजोगी आहे. पीडितेला न्याय मिळवून देण्यासाठी आरोपींवर कठोर कारवाई केली जाईल, असेही ते म्हणाले.
जोधपूर पूर्व पोलिस उपायुक्त अमृता दुहान यांनी सांगितले की, पीडित तरुणी तिच्या प्रियकरासह अजमेरहून पळून जोधपूरला पोहोचली होती. शनिवारी रात्री 10.30 च्या सुमारास दोघेही जोधपूरला पोहोचले होते.
इथे त्यांना रात्र घालवण्यासाठी गेस्ट हाऊसची गरज होती. त्यांनी एका गेस्ट हाऊसमध्ये जाऊन रुम मागितली असता तेथील केअरटेकर सुरेश जाट याने मुलीचा विनयभंग केला.
गेस्ट हाऊसमधून बाहेर पडल्यानंतर पीडिता आणि तिचा प्रियकर शहरातील पाओटा क्रॉसिंगवर पोहोचले. येथे त्यांची समंदर सिंग भाटी, धरमपाल सिंग आणि भट्टम सिंग यांची भेट झाली. तिघांचेही वय 20 ते 22 वर्षे आहे.
डीसीपींनी सांगितले की, आरोपींनी पीडिता आणि तिच्या प्रियकराशी मैत्री केली आणि त्यांना जेवण दिले. पीडितेने तिन्ही आरोपींना (Accused) स्वतःबद्दल आणि तिच्या प्रियकराबद्दल सांगितल्यावर त्यांनी दोघांनाही मदत करण्याचे आश्वासन दिले.
पोलिसांनी दिलेल्या माहितीनुसार, मदत करण्याच्या नावाखाली तीन आरोपी रविवारी पहाटे 4 वाजता पीडितेला आणि तिच्या प्रियकराला रेल्वे स्टेशनवर सोडण्याच्या बहाण्याने थेट जय नारायण व्यास विद्यापीठाच्या हॉकी मैदानावर नेले. येथे त्यांनी प्रियकराला बेदम मारहाण करुन ओलीस ठेवले. यानंतर त्यांनी पीडितेवर एकामागून एक बलात्कार केला.
मॉर्निंग वॉक करणाऱ्यांना पाहून तिन्ही आरोपींनी घटनास्थळावरुन तात्काळ पळ काढला. पीडितेच्या प्रियकराने लोकांना पाहिल्यानंतर त्यांच्याकडे मदत मागितली. त्यानंतर पोलिसांना या घटनेविषयी माहिती देण्यात आली.
पोलिसांनी तात्काळ घटनास्थळ गाठून पीडितेची तक्रार ऐकून घेतली. पीडित तरुणी आणि तिच्यासोबत असलेल्या मुलाच्या जबाबाच्या आधारे पोलिसांनी तातडीने आरोपीचा शोध सुरु केला. पोलिसांनी डॉग स्क्वॉड आणि फॉरेन्सिक सायन्स लॅबोरेटरी टीमलाही घटनास्थळी पाचारण केले.
राजस्थानचे मुख्यमंत्री अशोक गेहलोत यांनी या संपूर्ण प्रकरणात पोलिसांना कठोर कारवाई करण्यास सांगितले आहे, तर विरोधी पक्षाने आरोपी भाजपच्या विद्यार्थी संघटनेशी संबंधित असल्याचा आरोप केला आहे.
भाजप अध्यक्ष जेपी नड्डा यांच्यावर निशाणा साधत त्यांनी म्हटले आहे की, या प्रकारात त्यांचे कोणतेही विधान समोर आले नाही, यावरुन भाजप महिलांवरील गुन्ह्यांबाबत किती जागरुक आहे हे दिसून येते. दुसरीकडे, भाजपने तिन्ही आरोपी अभाविपशी संबंधित असल्याचं प्रकरण पूर्णपणे बाजूला सारलं आहे.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
