Rahul Gandhi: ''त्यांना आजचा तरुण दिवसभर मोबाईलवर राहणारा, जय श्री राम म्हणणारा अन्...''; राहुल गांधींचा मोदींना टोला

Rahul Gandhi in Shajapur: शाजापूरला पोहोचलेल्या भारत जोडो न्याय यात्रेदरम्यान काँग्रेस नेते राहुल गांधी यांनी एका सभेला संबोधित केले. यावेळी ते म्हणाले की, ''आज संपूर्ण देशात बेरोजगारीची स्थिती आहे. अग्निवीर योजना आणून मोदी सरकारने तरुणांना बेरोजगारीच्या खाईत लोटले आहे.'' यासोबतच मागासवर्गीयांचा मुद्दा उपस्थित करताना त्यांनी केंद्र आणि राज्यातील भाजप सरकारवर जोरदार टीका केली, यासोबतच ते म्हणाले की, ''मोदीजींना आजचा तरुण दिवसभर मोबाईलवर राहणारा, जय श्री राम म्हणणारा, आणि भुकेने मरणारा हवा आहे.''

राहुल यांच्या ताफ्यासमोर 'मोदी-मोदी'च्या घोषणा

दरम्यान, नियोजित मार्गानुसार न्याय यात्रा माझनिया जोड धोबी चौक, टाकी चौक मार्गे ट्रफिक पॉंइंट पोहोचली. येथे भाजप कार्यकर्त्यांनी राहुल गांधींच्या (Rahul Gandhi) ताफ्यासमोर 'मोदी-मोदी'च्या घोषणा दिल्या. यानंतर राहुल गांधी आपल्या गाडीतून खाली उतरले आणि भाजप कार्यकर्त्यांना भेटायला गेले. मिळालेल्या माहितीनुसार, राहुल गांधींनी घोषणाबाजी करणाऱ्या लोकांना टॉफीचे वाटप केले. त्याचवेळी, भाजप कार्यकर्त्यांनी राहुल गांधींना बटाटे भेट दिले.

काँग्रेसमध्ये दुफळी पाहायला मिळाली

राहुल गांधींच्या भारत जोडो न्याय यात्रेबाबत काँग्रेसजनांमध्ये प्रचंड उत्साह आहे. शाजापूर राजगढच्या सीमावर्ती शहर सारंगपूरपासून ते मकसीपर्यंत काँग्रेस कार्यकर्त्यांनी ठिकठिकाणी राहुल गांधींच्या स्वागताचे होर्डिंग लावले होते. सुमारे 50 किलोमीटरच्या या प्रवासात हजारो फ्लेक्स आणि होर्डिंग्ज लावण्यात आले होते, हे विशेष. मात्र या फ्लेक्समध्ये काँग्रेसमधील (Congress) गटबाजीही दिसून आली. यामध्ये दिग्विजय सिंह गट, कमलनाथ गट आणि जितू पटवारी गटाचे फ्लेक्स वेगवेगळ्या पद्धतीने पाहायला मिळाले.