फिरोजपूर: पंजाबमधील फिरोजपूर येथून एक अत्यंत दुर्दैवी आणि हृदयद्रावक घटना समोर आली आहे. शनिवारी सकाळी फाजिल्का रोडवरील जंगा वाले वळणावर एक पिकअप गाडी आणि भरधाव ट्रकमध्ये भीषण अपघात झाला. या अपघाताचा फटका इतका मोठा होता की, ८ जणांचा जागीच मृत्यू झाला असून १५ हून अधिक लोक गंभीर जखमी झाले आहेत. मृतांमध्ये एकाच कुटुंबातील सदस्यांचा समावेश असल्याने परिसरात सर्वत्र हळहळ व्यक्त होत आहे.
मिळालेल्या माहितीनुसार, हे कुटुंब त्यांच्या घरातील एका व्यक्तीच्या निधनानंतर अस्थी विसर्जन करण्यासाठी गेले होते. धार्मिक विधी आटोपून शोककुळ वातावरणात सर्वजण पिकअप गाडीतून घरी परतत होते. पण, नियतीच्या मनात काही वेगळेच होते. त्यांची गाडी फाजिल्का रोडवरील जंगा वाले मोडजवळ पोहोचली असता, समोरून येणाऱ्या एका ट्रकने त्यांच्या गाडीला जोरदार धडक दिली. काही क्षणातच या कुटुंबाचा प्रवास एका मोठ्या शोकांतिकेत बदलला.
प्रत्यक्षदर्शींनी दिलेल्या माहितीनुसार, हा अपघात एवढा भयानक होता की त्याचा आवाज दूरवर ऐकू आला. ट्रकचा वेग जास्त असल्याने पिकअप गाडीच्या पुढच्या भागाचा पूर्णपणे चक्काचूर झाला. गाडीचा सांगाडा चेपल्यामुळे आत बसलेले लोक रक्ताच्या थारोळ्यात तिथेच अडकून पडले. घटनास्थळी बालकांचा आणि महिलांचा आक्रोश ऐकून जवळच्या दुकानदार आणि वाटसरूंनी तात्काळ मदतीसाठी धाव घेतली.
अपघातानंतर स्थानिक नागरिकांनी कमालीचे धैर्य दाखवत बचावकार्य सुरू केले. त्यांनी लोखंडी रॉडच्या साहाय्याने गाडीचे दरवाजे तोडून आत अडकलेल्या जखमींना बाहेर काढले. सरकारी रुग्णवाहिका आणि पोलिसांची वाट न पाहता, स्थानिकांनी स्वतःच्या वाहनांमधून जखमींना जवळच्या सिव्हिल हॉस्पिटलमध्ये दाखल केले. नागरिकांच्या या सतर्कतेमुळे अनेकांचे प्राण वाचण्यास मदत झाली.
सिव्हिल हॉस्पिटलचे मुख्य वैद्यकीय अधिकारी डॉ. निखिल गुप्ता यांनी सांगितले की, जखमींपैकी अनेकांची प्रकृती चिंताजनक आहे. अंतर्गत दुखापत आणि रक्तस्त्राव जास्त झाल्यामुळे प्राथमिक उपचार करून काही रुग्णांना तातडीने 'गुरु गोबिंद सिंह मेडिकल कॉलेज आणि हॉस्पिटल' येथे पुढील उपचारासाठी पाठवण्यात आले आहे.
घटनेची माहिती मिळताच पोलीस दलाने घटनास्थळी धाव घेतली. क्रेनच्या साहाय्याने दोन्ही अपघातग्रस्त वाहने रस्त्यावरून बाजूला करून वाहतूक कोंडी फोडण्यात आली. पोलिसांनी याप्रकरणी गुन्हा दाखल केला असून, हा अपघात ट्रॉल चालकाच्या निष्काळजीपणामुळे झाला की वळणावर अंदाज न आल्याने झाला, या दोन्ही बाजूने तपास सुरू केला आहे.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.