Piyush Goyal Deepfake Video Viral: केंद्रीय मंत्री पीयूष गोयल यांचा एक व्हिडिओ सध्या सोशल मीडियावर प्रचंड व्हायरल होत आहे, ज्यामध्ये ते कॉकरोच जनता पार्टीच्या आंदोलनाबाबत अतिशय वादग्रस्त आणि धक्कादायक विधान करताना दिसत आहेत. मात्र, या व्हिडिओवर आता स्वतः पीयूष गोयल यांनी स्पष्टीकरण दिले असून हा व्हिडिओ पूर्णपणे बनावट आणि आर्टिफिशियल इंटेलिजन्सच्या मदतीने तयार केलेला डीपफेक असल्याचे स्पष्ट केले. याप्रकरणी दोषींवर कठोर कायदेशीर कारवाई केली जाईल, असा इशाराही त्यांनी दिला.
सोशल मीडियावर व्हायरल केलेल्या बनावट व्हिडिओमध्ये पीयूष गोयल संसद भवनाबाहेर प्रसारमाध्यमांशी बोलताना असे म्हणताना दिसत होते की, दोन-तीन कॉकरोचांना जाहीरपणे फाशी दिली पाहिजे, जेणेकरुन कॉकरोच जनता पार्टीला आपल्या ताकदीची जाणीव होईल. हे दृश्य पाहून त्यांचा सर्व हुल्लडबाजीचा प्रकार शांत होईल. हा व्हिडिओ समोर आल्यानंतर सोशल मीडियावर संतापाची लाट उसळली.
या प्रकरणाची गंभीर दखल घेत गोयल यांनी चाणक्यपुरी पोलीस ठाण्यात अधिकृत तक्रार नोंदवली. 25 जुलै रोजी पहाटे 4.35 वाजता या प्रकरणी एफआयआर (क्र. 123/26) दाखल करण्यात आला. गैरसमज पसरवण्यासाठी आणि दिशाभूल करण्यासाठी एआय तंत्रज्ञानाचा असा गैरवापर अजिबात सहन केला जाणार नाही, असे त्यांनी स्पष्ट केले. यासोबतच नागरिकांनी केवळ अधिकृत आणि विश्वासार्ह बातम्यांवरच विश्वास ठेवावा, असे आवाहनही त्यांनी केले.
दुसरीकडे, पीआयबी (PIB) फैक्ट चेकने देखील हा व्हिडिओ पूर्णपणे फेक असल्याचे जाहीर केले. पाकिस्तानी प्रोपेगंडा चालवणाऱ्या काही सोशल मीडिया अकाऊंट्सवरुन हा खोटा दावा केला जात असल्याचे पीआयबीने उघडकीस आणले. केंद्रीय मंत्री पीयूष गोयल (Piyush Goyal) यांनी आंदोलक विद्यार्थ्यांविरोधात किंवा सीजेपीबाबत असे कोणतेही हिंसक अथवा धमकीवजा विधान केलेले नाही. एआय तंत्रज्ञानाचा वापर करुन लोकशाही संवादाला गमावण्याचा हा प्रयत्न असून अशा फेक न्यूजपासून नागरिकांनी सावध राहावे, असे आवाहन करण्यात आले.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.