Odisha Accident: ओडिशात काळजाचा थरकाप उडवणारा अपघात, भरधाव बसची ऑटोला जोरदार धडक; एकाच कुटुंबातील 6 जणांचा मृत्यू, 4 जखमी

Odisha Ganjam Road Accident: ओडिशातील गंजाम जिल्ह्यातून एक अत्यंत थरारक आणि मनाला चटका लावणारी अपघाताची घटना समोर आली. पुरुषोत्तमपुर पोलीस ठाण्याच्या हद्दीतील लाडकापल्ली चौकाजवळ एका भरधाव खासगी बसने ऑटो-रिक्षाला दिलेल्या भीषण धडकेत एकाच कुटुंबातील 6 जणांचा जागीच मृत्यू झाला. हा अपघात इतका भयानक होता की, धडक दिल्यानंतरही बस थांबली नाही; ती ऑटोला सुमारे 100 मीटरपर्यंत रस्त्यावरुन फरफटत घेऊन गेली. या काळजाचा थरकाप उडवणाऱ्या अपघातानंतर घटनास्थळी एकच आरडाओरडा आणि रक्ताचा सडा पाहायला मिळाला, ज्यामुळे संपूर्ण परिसरात शोककळा पसरली.

मिळालेल्या माहितीनुसार, या दुर्दैवी ऑटो-रिक्षात एकाच कुटुंबातील 10 जण स्वार होते. हे सर्वजण माँ सिंहासिनी देवीच्या दर्शनासाठी मंदिराकडे जात होते. भक्तीच्या उत्साहात प्रवास सुरु असतानाच लाडकापल्ली चौकाजवळ काळाने त्यांच्यावर झडप घातली. प्रत्यक्षदर्शनी दिलेल्या माहितीनुसार, समोरुन येणारी बस अत्यंत वेगात होती. अचानक बस चालकाचे वाहनावरील नियंत्रण सुटले आणि ती थेट ऑटो-रिक्षावर जाऊन आदळली. या भीषण धडकेत ऑटोचा अक्षरशः चक्काचूर झाला.

अपघाताची (Accident) भीषणता एवढी मोठी होती की, या दुर्घटनेत 6 भाविकांना आपले प्राण गमवावे लागले असून अद्याप मृत व्यक्तींची नावे अधिकृतपणे जाहीर करण्यात आलेली नाहीत. अपघात घडवल्यानंतर आरोपी बस चालक वाहनासह घटनास्थळावरुन फरार झाला.

अपघाताचा आवाज ऐकताच स्थानिक नागरिकांनी तातडीने मदतीसाठी धाव घेतली आणि अडकलेल्या लोकांना बाहेर काढण्याचे काम सुरु केले. घटनेची माहिती मिळताच स्थानिक पोलीस आणि रुग्णवाहिका पथक घटनास्थळी दाखल झाले. या अपघातात चार जण गंभीर जखमी झाले असून त्यांना तातडीने कोदला येथील रुग्णालयात दाखल करण्यात आले. मात्र, त्यांची प्रकृती चिंताजनक असल्याने अधिक उपचारासाठी त्यांना ब्रह्मपूर येथील एमकेसीजी मेडिकल कॉलेज आणि रुग्णालयात हलवण्यात आले.

जखमींपैकी काहींची प्रकृती अद्यापही अत्यंत नाजूक आहे. पुरुषोत्तमपुर पोलिसांनी या प्रकरणी गुन्हा दाखल करुन पुढील तपास सुरु केला असून, फरार बस चालकाचा शोध घेण्यासाठी पोलिसांची (Police) पथके रवाना करण्यात आली आहेत.