VIDEO: मुस्लिम विद्यार्थिनींनी बुरखा परिधान करुन केला 'रॅम्प वॉक'; जमियत-ए-उलेमाने दिला कारवाईचा इशारा

Muslim Girl Students: सोशल मीडियावर एक व्हिडिओ तूफान व्हायरल होत आहे. व्हायरल व्हिडिओमध्ये काही विद्यार्थिनी बुरखा परिधान करुन रॅम्प वॉक करताना दिसत आहेत. हा व्हिडिओ यूपीच्या मुझफ्फरनगर जिल्ह्यातील एका महाविद्यालयातील असल्याचे सांगण्यात येत आहे.

मिळालेल्या माहितीनुसार, महाविद्यालयात फॅशन शो आयोजित करण्यात आला होता, ज्यामध्ये विद्यार्थिनींनी सहभाग घेतला होता. मुस्लिम विद्यार्थिनींचा बुरखा घालून रॅम्प वॉक करतानाचा व्हिडिओ सोशल मीडियावर व्हायरल झाल्यानंतर एकच खळबळ उडाली.

फॅशन शो मध्ये विद्यार्थिनींनी बुरखा परिधान केल्याबद्दल जमियत-ए-उलेमाने नाराजी व्यक्त केली. तसेच कारवाईचा इशारा दिला.

मीडिया रिपोर्ट्सनुसार, उलेमाने सांगितले की, फॅशन डिस्प्लेसाठी बुरखा हा आयटम म्हणून दाखवू नये. जमियत-ए-उलेमाच्या या आक्षेपानंतर विद्यार्थिनींनीही आपले मत मांडले. एका विद्यार्थिनीने सांगितले की, तिला हे दाखवायचे आहे की बुरखा देखील फॅशनेबल असू शकतो.

बुरखा हा केवळ घरात परिधान करण्याचे साधन असू शकत नाही. तिने पुढे सांगितले की, ज्या फॅशन शोमध्ये छोटे कपडे परिधान केले जातात त्यामध्ये भाग घेऊ शकत नसल्यामुळे, मुस्लिम समाजातील महिलांसाठी (Women) तिला काहीतरी करण्याची इच्छा होती.

विद्यार्थिनींच्या या उपक्रमाला शिक्षकांनी पाठिंबा दिला

विद्यार्थ्यांच्या (Students) या उपक्रमाला मुझफ्फरनगर येथील श्री राम महाविद्यालयाचे शिक्षक डॉ.मनोज यांनी पाठिंबा दिला. त्यांनी सांगितले की, हिजाब किंवा बुरखा मुस्लिम महिलांमध्ये आत्मविश्वास वाढवू शकतो आणि जागतिक स्तरावर या पोशाखाशी संबंधित फॅशनच्या संधी वाढत आहेत.

ते पुढे म्हणाले, त्या खूप मेहनती विद्यार्थिनी आहेत. त्यांच्यापैकी एकाने विचार केला की त्यांनी मुस्लिम महिलांसाठी काहीतरी क्रिएटिव्ह करावे आणि हिजाब देखील फॅशनेबल असू शकतो हे दाखवून द्यायचे होते.

तथापि, जमियत-ए-उलेमाचे जिल्हा संयोजक मौलाना मुकर्रम कासमी यांनी तीव्र नाराजी व्यक्त करताना म्हटले की, ''बुरखा ही फॅशन प्रदर्शनाची वस्तू नाही आणि असे कृत्य एखाद्या विशिष्ट धर्माला लक्ष्य करते. मुस्लिम समाजाच्या भावना दुखावल्या आहेत.

भविष्यात अशा घटना घडल्यास कायदेशीर कारवाईचा सामना करावा लागेल. तुम्हाला फॅशन शो करायचा असाल तर करा पण कोणत्याही एका धर्माला टार्गेट करु नका.''