भारतीय क्रिकेटपटू मोहम्मद शमीची पत्नी हसीन जहाँ पुन्हा एकदा वादात अडकली आहे. यावेळी मात्र, तिच्यावर गंभीर आरोप झाले असून, तिच्या आणि मुलगी अर्शी जहाँ यांच्या विरोधात हत्येचा प्रयत्न, गुन्हेगारी कट आणि मारहाणीचा गुन्हा दाखल करण्यात आला आहे.
ही घटना पश्चिम बंगालच्या बीरभूम जिल्ह्यातील सुरी शहरातील आहे. हसीन जहाँच्या शेजाऱ्यांनी तक्रार दाखल केली असून, दलिया खातून नावाच्या शेजाऱ्याने आरोप केला आहे की, जमीन वादातून हसीन जहाँ आणि तिच्या मुलीने तिच्यावर हल्ला केला.
सुरीच्या वॉर्ड क्रमांक ५ मध्ये असलेल्या वादग्रस्त जागेवर हसीन जहाँने बांधकाम सुरू केले होते. ही मालमत्ता तिच्या मुलगी अर्शी जहाँच्या नावावर असल्याचा दावा करण्यात आला आहे. मात्र, दलिया खातूनने या बांधकामाला विरोध केला आणि काम थांबवण्याचा प्रयत्न केला. यावरून वाद चिघळला आणि दोघींमध्ये जोरदार बाचाबाची झाली.
दलिया खातूनचा आरोप आहे की, वादाच्या दरम्यान हसीन जहाँ व अर्शी जहाँ यांनी तिला धक्काबुक्की केली आणि गंभीर जखम पोहोचवली. एवढेच नव्हे तर, या प्रकरणाशी संबंधित व्हिडिओ देखील समोर आला आहे, ज्यामध्ये हसीन जहाँ एका महिलेला धक्काबुक्की करताना दिसत आहे.
दलिया खातूनच्या तक्रारीवरून हसीन जहाँ व तिच्या मुलीवर भारतीय दंड संहितेच्या (BNS) कलम १२६ (२), ११५ (२), ११७ (२), १०९, ३५१ (३) आणि ३ (५) अंतर्गत गुन्हा दाखल करण्यात आला आहे.
सोशल मीडियावर व्हिडिओ व्हायरल
NCMIndia ने सोशल मीडिया प्लॅटफॉर्म X (माजी ट्विटर) वर या घटनेचा व्हिडिओ शेअर केला असून, यामुळे हा प्रकार चांगलाच चर्चेत आला आहे. मात्र, पोलीस प्रशासनाने अद्याप या प्रकरणाबाबत कोणतीही अधिकृत माहिती दिलेली नाही.
भारतीय क्रिकेटविश्वात आपल्या खेळाने चर्चेत राहणाऱ्या मोहम्मद शमीचे वैयक्तिक आयुष्य पुन्हा एकदा वादाच्या भोवऱ्यात सापडले आहे. याआधीही हसीन जहाँने शमीवर गंभीर आरोप केले होते. आता या नवीन प्रकरणामुळे पुन्हा एकदा शमीचे नाव चर्चेत आले आहे.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.