40 कोटींच्या संपत्तीसाठी महिलेची हत्या, पतीसह मुलीला अटक

एका महिलेच्या हत्येचा उलगडा करताना कर्नाटक (Karnataka) पोलिसांनी सात आरोपींना अटक केली आहे. आरोपींमध्ये मृत महिलेचा पती आणि तिच्या मुलीचा समावेश आहे. 27 डिसेंबरच्या रात्री अर्चना रेड्डी नावाच्या महिलेची हत्या करण्यात आली होती. या हत्येमागील खरे कारण 40 कोटींचे असल्याचे बोलले जात आहे. आरोपींनी गुन्ह्याची कबुली दिल्याचे पोलिसांचे म्हणणे आहे. याप्रकरणी मृत महिलेच्या मुलाने पोलिसांत तक्रार दाखल केली होती.

40 कोटींच्या मालमत्तेसाठी हत्या

पिता-पुत्रीने मृत महिलेची मालमत्ता मिळवण्यासाठी अर्चनाच्या हत्येचा कट रचल्याचे पोलिसांनी (police) सांगितले. सीसीटीव्ही फुटेज आणि तक्रारीच्या आधारे तपास करण्यात आल्याचे पोलिसांनी सांगितले. त्यानंतर संपूर्ण सत्य सर्वांसमोर आले. मृत महिलेचा पती नवीन याने पाच सशस्त्र हल्लेखोरांसह पत्नीवर वार करून तिची हत्या केली. पोलिसांना मिळालेल्या सीसीटीव्ही फुटेजनुसार, मृत महिलेचा पती तिच्यावर चाकूने हल्ला करताना दिसत आहे. त्याच्यासोबत पाच जण दिसत आहेत. मिळालेल्या माहितीनुसार, त्याच्या पत्नीलाही आरोपी नवीनच्या अवैध संबंधांची माहिती होती. त्याचवेळी पत्नीचे कोणाशी तरी अवैध संबंध असल्याचा संशयही पतीला होता. अनेक दिवसांपासून घरात वाद सुरू होता.