भगवंत मान सरकारमध्ये मंत्रिपदासाठी चढाओढ

आम आदमी पार्टीने पंजाबमध्ये घवघवीत यश मिळवले आहे. 'आप'चे भगवंत मान पंजाबचे नवे मुख्यमंत्री होणार हे निश्चित असले तरी त्यांच्या मंत्रिमंडळात कुणाचा समावेश होणार हे अजून स्पष्ट नाही. मंत्रिपदासाठी आमदारांची धावपळ सुरू झाली आहे. मंत्रिपदाच्या शर्यतीत पुढे राहण्यासाठी अनेकांनी दिल्लीकडे धाव घेतल्याची माहिती समोर येत आहे. (Punjab AAP News)

पंजाबमध्ये (Punjab) 'आप'च्या सरकार स्थापनेचा मार्ग मोकळा होताच, नवे आमदार सक्रिय झाले आहेत. जगरांवमधून दुसऱ्यांदा निवडणूक जिंकून विधानसभेत पोहोचलेल्या सर्वजित कौर मनुके या मंत्रिपदाच्या शर्यतीत आघाडीवर आहेत. याशिवाय काँग्रेसमधून 'आप'मध्ये सामील होऊन आमदार झालेले लोक देखील इच्छुक आहेत.

शहरी भागातून दलजितसिंग गरेवाल भोला आणि उत्तरचे आमदार मदनलाल बग्गा हे प्रमुख उमेदवार आहेत. दलजित सिंग करेवाल यांनी यापूर्वीही 'आप'च्या तिकिटावर निवडणूक लढवली असून ते 'आप'चे जिल्हाप्रमुखही राहिले आहेत. काही काळ काँग्रेसमध्ये (Congress) राहिल्यानंतर ते 'आप'मध्ये परतले आणि तिकीट मिळवण्यातही ते यशस्वी झाले. त्यांचे 'आप'च्या केंद्रीय नेतृत्वाशी संबंध आहेत. उत्तरेतील आमदार मदनलाल बग्गा यांनी अकाली दल सरकारच्या काळात राज्यमंत्रिपद भूषवले असून त्यांनी उत्तरमधून सातवेळा आमदार राकेश पांडे यांचा पराभव केला आहे. त्यांचा कॅबिनेट पद मिळवण्याचा प्रयत्न सुरू आहे. 'आप'चे (AAP) सर्वेसर्वा अरविंद केजरीवाल कुणाला संधी देतात याकडे सर्वांचे लक्ष लागले आहे.