आजच्या काळात चांगली नोकरी मिळवणे हे अनेक तरुणांसाठी मोठे आव्हान बनले आहे. नोकरीच्या शोधात असलेले उमेदवार LinkedIn, Naukri आणि इतर जॉब पोर्टलवर दररोज अनेक कंपन्यांमध्ये अर्ज करतात. मात्र, शेकडो अर्ज करूनही अनेकांना मुलाखतीसाठी फोन येत नाही.
अशा परिस्थितीत एका तरुणाने नोकरी मिळवण्यासाठी वेगळीच रणनीती वापरल्याचा दावा केला आहे. विशेष म्हणजे, त्याने कोणत्याही कंपनीच्या रिक्त पदासाठी थेट अर्ज केला नव्हता. तरीही त्याला चार मोठ्या स्टार्टअप कंपन्यांकडून नोकरीच्या ऑफर मिळाल्या. २०२६ मध्ये मिळालेल्या या ऑफर्समध्ये Y Combinator शी संबंधित एका कंपनीचाही समावेश होता. या सर्व ऑफर्सचे सरासरी वार्षिक वेतन सुमारे १९ लाख रुपये असल्याचे त्याने सांगितले आहे. त्याने सोशल मीडियावर शेअर केलेली ही पद्धत सध्या चर्चेचा विषय ठरत आहे.
या तरुणाने नोकरी शोधण्याची पारंपरिक पद्धत बाजूला ठेवून थेट कंपन्यांमधील भरती प्रक्रियेशी संबंधित लोकांशी संपर्क साधण्यावर भर दिला. त्याच्या मते, LinkedIn वर कंपन्यांच्या नवीन भरतीविषयक पोस्ट नियमितपणे पाहणे हा पहिला महत्त्वाचा टप्पा आहे.
विशेष म्हणजे, भरतीची पोस्ट २४ तासांपेक्षा जुनी नसावी आणि त्या पोस्टला १०० पेक्षा कमी लाइक्स असावेत, असा त्याचा सल्ला आहे. कारण नवीन पोस्टवर अद्याप फारशा उमेदवारांचे लक्ष गेलेले नसते. अशा वेळी लवकर संपर्क साधल्यास भरती करणाऱ्या व्यक्तीपर्यंत आपली माहिती पोहोचण्याची शक्यता वाढू शकते.
LinkedIn वर एखादी भरतीची पोस्ट दिसल्यानंतर त्यावर थेट कमेंट करणे किंवा मेसेज पाठवण्याऐवजी संबंधित व्यक्तीचा ई-मेल शोधून संपर्क साधण्याचा सल्ला या तरुणाने दिला आहे. त्याच्या मते, ई-मेल शक्यतो पाच ओळींपेक्षा मोठा नसावा. त्यामध्ये स्वतःची ओळख, संबंधित पदासाठी असलेली कौशल्ये आणि कंपनीला आपण कशाप्रकारे मदत करू शकतो, हे थोडक्यात स्पष्ट करावे.
मोठमोठे परिच्छेद लिहिण्यापेक्षा कमी शब्दांत मुद्देसूद माहिती दिल्यास समोरच्या व्यक्तीला ती समजणे सोपे जाते. त्यामुळे ई-मेल लिहिताना अनावश्यक माहिती टाळून थेट विषयावर बोलणे महत्त्वाचे आहे.
या तरुणाने नोकरी शोधण्यासाठी आणखी एक महत्त्वाची युक्ती सांगितली आहे. ज्या स्टार्टअप कंपन्यांना नुकतेच सीड फंडिंग मिळाले आहे, अशा कंपन्यांची माहिती मिळवा. कारण नवीन गुंतवणूक मिळाल्यानंतर अनेक स्टार्टअप कंपन्या व्यवसायाचा विस्तार करण्याच्या तयारीत असतात. यासाठी त्यांना नवीन कर्मचारी आणि वेगवेगळ्या कौशल्यांची आवश्यकता भासू शकते.
अशा कंपन्यांची निवड केल्यानंतर त्यांच्या व्यवसायाची माहिती घ्यावी. आपल्याकडील कौशल्यांचा कंपनीच्या प्रगतीसाठी कसा उपयोग होऊ शकतो, याचा विचार करावा. त्यानंतर कंपनीचे संस्थापक आणि भरती प्रक्रियेशी संबंधित अशा तीन महत्त्वाच्या व्यक्तींची यादी तयार करून त्यांना स्वतंत्र ई-मेल पाठवावेत.
नोकरीच्या शोधात असलेल्या उमेदवारांनी दररोज किमान २० ई-मेल पाठवण्याचा प्रयत्न करावा, असेही त्याने सुचवले आहे. मात्र, प्रत्येक कंपनीला एकसारखा ई-मेल पाठवण्याऐवजी संबंधित कंपनीच्या कामानुसार त्यामध्ये बदल करणे आवश्यक आहे. ई-मेल लिहिण्यासाठी पूर्णपणे AI टूल्सवर अवलंबून राहू नये, असेही त्याचे मत आहे.
AI च्या मदतीने माहिती मिळवता येऊ शकते. Claude सारख्या टूल्सचा वापर करून नवीन भरतीच्या पोस्ट आणि स्टार्टअप फंडिंगविषयी माहिती शोधता येते. मात्र, अंतिम ई-मेल स्वतःच्या शब्दांत आणि नैसर्गिक भाषेत लिहिल्यास तो अधिक वैयक्तिक वाटू शकतो.
या तरुणाने एक महत्त्वाची गोष्ट स्पष्ट केली आहे. केवळ कंपन्यांना ई-मेल पाठवल्याने नोकरी मिळेलच, असे नाही. संबंधित पदासाठी आवश्यक कौशल्ये, अनुभव आणि काम करण्याची क्षमता उमेदवाराकडे असणे गरजेचे आहे. या पद्धतीचा मुख्य उद्देश म्हणजे भरती करणाऱ्या व्यक्तींच्या नजरेत येणे आणि थेट संवाद साधण्याची संधी निर्माण करणे हा आहे.
त्याच्या दाव्यानुसार, सातत्याने ही पद्धत वापरल्यास दुसऱ्या आठवड्यापर्यंत मुलाखतीसाठी संपर्क येण्यास सुरुवात होऊ शकते. मात्र, हा त्याचा वैयक्तिक अनुभव असून प्रत्येक उमेदवाराला असेच यश मिळेल याची खात्री नाही.
या तरुणाने आपला अनुभव सोशल मीडियावर शेअर केल्यानंतर त्यावर वेगवेगळ्या प्रतिक्रिया उमटल्या. काही युजर्सनी त्याच्या दाव्याच्या सत्यतेवर प्रश्न उपस्थित केले. तर काहींनी नोकरी मिळवण्यासाठी इतके प्रयत्न करावे लागत असल्याबद्दल आश्चर्य व्यक्त केले.
एका युजरने ही पोस्ट एखाद्या व्यवसायाच्या जाहिरातीसाठी तयार केली असावी, अशी शंका व्यक्त केली. त्यावर संबंधित तरुणाने आपण स्वतःचा स्टार्टअप सुरू करत असल्याचे सांगितले. मात्र, त्याने शेअर केलेला अनुभव खरा असून ही पद्धत आपल्यासाठी उपयोगी ठरल्याचा दावा केला. दुसरीकडे, एका युजरने गंमतीशीर प्रतिक्रिया देताना म्हटले की, नोकरी मिळवण्यासाठीच एवढी मेहनत करावी लागत असेल, तर नोकरी मिळाल्यानंतर कंपनी किती काम करून घेईल? अशा प्रतिक्रियांमुळे नोकरी मिळवण्याच्या बदलत्या पद्धतींवर सोशल मीडियावर चर्चा सुरू झाली आहे.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.