Kolkata Hotel Fire: "उपचारासाठी भारतात आले अन् काळाने गाठले!" कोलकात्यात हॉटेलला भीषण आग, 9 बांगलादेशींचा मृत्यू; अनेकजण जखमी

Kolkata Hotel Fire Mirza Galib Street: कोलकात्यातील मध्यवर्ती भागात असलेल्या मिर्झा गालिब स्ट्रीटवरील एका हॉटेलमध्ये बुधवारी (19 ऑगस्ट) पहाटेच्या सुमारास अचानक भीषण आग लागल्याची धक्कादायक घटना समोर आली. या आगीत एका बालकासह 9 जणांचा होरपळून मृत्यू झाला. हे सर्व मृत नागरिक बांगलादेशचे रहिवासी असून ते उपचारासाठी आणि पर्यटनासाठी भारतात आले होते. या दुर्घटनेत अनेक लोक गंभीर जखमी झाले असून त्यांच्यावर स्थानिक रुग्णालयात उपचार सुरु आहेत.

पहाटे सुमारे 2 वाजण्याच्या सुमारास जेव्हा हॉटेलमधील सर्व नागरिक गाढ झोपेत होते, तेव्हा अचानक आगीचा भडका उडाला. काही वेळातच संपूर्ण हॉटेलमध्ये धुराचे प्रचंड साम्राज्य पसरले. यामुळे परिसरात गोंधळाचे आणि भीतीचे वातावरण निर्माण झाले. झोपेत असलेल्या नागरिकांना काही समजण्यापूर्वीच आगीने रौद्ररुप धारण केले. काही पर्यटकांनी कसेबसे बाहेर पडून स्वतःचा जीव वाचवला, परंतु अनेक जण धूर आणि आगीच्या ज्वाळांमध्ये अडकून पडले.

घटनेची माहिती मिळताच अग्निशमन दलाच्या 4 गाड्या तातडीने घटनास्थळी दाखल झाल्या. अग्निशमन दलाच्या जवानांनी अथक प्रयत्नांनंतर आगीवर (Fire) नियंत्रण मिळवले आणि आत अडकलेल्या लोकांना बाहेर काढले. घटनेची माहिती मिळताच पोलीस आणि प्रशासकीय वरिष्ठ अधिकाऱ्यांनी घटनास्थळी धाव घेऊन मदत आणि बचावकार्याची पाहणी केली.

प्राथमिक तपासात आगीचे कारण शॉट सर्किट असल्याचे मानले जात आहे, मात्र अधिकृत सूत्रांकडून याला अद्याप दुजोरा मिळालेला नाही. हॉटेलमधील अग्निरोधक यंत्रणा, आणीबाणीच्या वेळी बाहेर पडण्याचे मार्ग आणि अलार्म योग्य प्रकारे कार्यरत होते की नाही, याची पोलीस प्रशासनाकडून कसून चौकशी केली जात आहे.