Karun Nair: ट्रिपल सेंच्युरीचा हीरो, पण कमबॅकमध्ये झिरो; 8 वर्षांनी संधी मिळालेल्या करुण नायरचा 'फ्लॉप शो' कायम

Ind vs Eng 1st Test

भारत आणि इंग्लंड यांच्यात सुरू असलेल्या पाच कसोटी सामन्यांच्या मालिकेतील पहिल्या कसोटीत करुण नायरला भारतीय संघात पुनरागमन करण्याची सुवर्णसंधी मिळाली. तब्बल ३००६ दिवसांनंतर, म्हणजेच सुमारे ८ वर्षांनंतर, करुण नायरला टेस्ट प्लेइंग इलेव्हनमध्ये स्थान मिळालं. मात्र, ही संधी त्याच्यासाठी ‘फ्लॉप ’ ठरल्याचं पाहायला मिळत आहे.

करुण नायरने २०१६ साली इंग्लंडविरुद्धच ऐतिहासिक नाबाद ३०३ धावांची खेळी करत सर्वांना थक्क केलं होतं. तो भारतीय कसोटी क्रिकेटमध्ये तिहेरी शतक ठोकणारा फक्त दुसरा फलंदाज ठरला. मात्र त्या नंतर त्याचा फॉर्म अचानक खालावला आणि तो संघाबाहेर फेकला गेला. २०१७ साली ऑस्ट्रेलियाविरुद्ध त्याने शेवटचा कसोटी सामना खेळला होता.

कमबॅकमध्ये निराशाजनक कामगिरी

या कसोटीत पहिल्या डावात फलंदाजी करताना नायर फक्त ४ चेंडूत शून्यावर बाद झाला. बेन स्टोक्सच्या चेंडूवर ऑली पोपने त्याचा अप्रतिम झेल घेतला. दुसऱ्या डावात त्याने २० धावा केल्या, पण ही खेळी पुरेशी ठरली नाही. अशा प्रकारे दोन्ही डावांत त्याचा प्रभावी ठसा उमटला नाही, आणि त्याचं पुनरागमन फिकं ठरलं.

पुनरागमनासाठी मेहनत

करुण नायरने गेल्या काही वर्षांत देशांतर्गत क्रिकेटमध्ये जबरदस्त कामगिरी केली. इंडिया अ विरुद्ध इंग्लंड लायन्स कसोटीत त्याने २०४ धावांची खेळी करत निवडकर्त्यांचं लक्ष वेधलं. २०२२ मध्ये कर्नाटक रणजी संघातून वगळल्यानंतर, त्याने विदर्भ संघातून नवी सुरुवात केली आणि २०२४-२५ च्या हंगामात रणजी ट्रॉफी विजेत्या विदर्भ संघाचा प्रमुख आधारस्तंभ ठरला. याच हंगामात त्याने ८६३ धावा (सरासरी ५३.९३) केल्या.

तसंच, नॉर्थम्प्टनशायरकडून काउंटी क्रिकेट खेळताना त्याला परदेशातही अनुभव मिळाला. या संपूर्ण कालावधीत नायरने फलंदाज म्हणून आपली क्षमता सिद्ध करत राहिली.

करुण नायरचा कसोटी संघातील समावेश हा केवळ आकड्यांच्या आधारे नव्हता, तर त्याच्या अनुभव, संयम आणि मोठी खेळी खेळण्याच्या क्षमतेवर आधारित होता. मात्र, ८ वर्षांची प्रतीक्षा करून आलेल्या या संधीचं त्याचं रुपांतर अपयशात झाल्याचं चित्र पहिल्या सामन्यानंतर समोर आलं आहे.

आता पुढे काय?

करुण नायरचा फ्लॉप शो पुढेही सुरू राहणार की तो आगामी सामन्यांमध्ये पुनरागमन करत आपलं स्थान पुन्हा मजबूत करणार, हे पाहणं उत्सुकतेचं ठरेल. भारतीय संघ व्यवस्थापन त्याला आणखी एक संधी देणार का, हे आगामी दिवसांत स्पष्ट होईल.