कपिल सिब्बलांनी कॉंग्रेस सोडताच पूर्व कॉंग्रेस नेत्याने साधला निशाणा

माजी केंद्रीय मंत्री कपिल सिब्बल यांनी बुधवारी अपक्ष उमेदवार म्हणून उत्तर प्रदेशमधून राज्यसभा निवडणुकीसाठी अर्ज दाखल केला. कपिल सिब्बल यांना समाजवादी पक्षाने पाठिंबा दिला आहे. कपिल सिब्बल यांनी पत्रकारांशी बोलताना सांगितले की, 'मी 16 मे रोजी काँग्रेस पक्षाचा राजीनामा दिला होता.' सिब्बल यांनी काँग्रेस सोडल्याची घोषणा केल्यानंतर विरोधी पक्षांकडून हल्ले आणखी तीव्र झाले आहेत. गेल्या वर्षी काँग्रेस सोडून भाजपमध्ये दाखल झालेल्या जितिन प्रसाद यांनी त्यांचे जुने ट्विट रिट्विट करताना सिब्बल यांना टोला लगावला आहे.

विशेष म्हणजे, जितिन प्रसादांनी काँग्रेस (Congress) सोडल्यानंतर सिब्बल यांनी ट्विट केले होते की, 'जितिन प्रसादांना भाजपकडून (BJP) ‘प्रसाद’ मिळणार का? त्यांना केवळ निवडणुकीसाठीच वेठीस धरण्यात आले आहे.'

दुसरीकडे, नामांकनानंतर बुधवारी सिब्बल म्हणाले की, 'मी काँग्रेसचा नेता होतो, पण आता नाही. मी 16 रोजी काँग्रेसच्या सदस्यत्वाचा राजीनामा दिला आहे. मी सपा अध्यक्ष अखिलेश यादव (Akhilesh Yadav) यांचे आभार मानतो. 2024 च्या निवडणुकीसाठी आपण सर्व एकत्र येत आहोत. केंद्र सरकारच्या त्रुटींवर प्रकाश टाकणार आहे.'