ISRO Satellite Launch: अखेर इस्रोचे 'कमबॅक'! आठ महिन्यांच्या प्रतीक्षेनंतर अवकाश उड्डाणांना मुहूर्त; 4 सप्टेंबरला GSLV-F17 मधून EOS-05 चे प्रक्षेपण

पुणे: भारतीय अवकाश संशोधन संस्थेतर्फे (इस्रो) भूस्थिर उपग्रह प्रक्षेपकाला (जीएसएलव्ही एफ १७) श्रीहरिकोटाच्या दुसऱ्या लाँच पॅडवर हलवण्यात आले असून, आठ महिन्यांच्या शांततेनंतर ‘इस्रो’ची अवकाश प्रक्षेपणे लवकरच सुरू होण्याची अपेक्षा आहे. येत्या चार सप्टेंबरला ‘ईओएस ०५’ या भूस्थिर कक्षेतून दूरसंवेदन (रिमोट सेन्सिंग) करणाऱ्या देशातील पहिल्या उपग्रहाचे प्रक्षेपण नियोजित आहे.

गेल्या वर्षी २४ डिसेंबरला अमेरिकेच्या ब्लूबर्ड ब्लॉक २ या दूरसंपर्क उपग्रहाचे लाँच व्हेईकल मार्क ३ (एलव्हीएम ३) या रॉकेटच्या साह्याने यशस्वी प्रक्षेपण करण्यात आले होते. यावर्षी ध्रुवीय उपग्रह प्रक्षेपकाचे (पीएसएलव्ही सी ६२) १२ जानेवारीला झालेले उड्डाण अयशस्वी ठरले होते. त्यानंतर गेल्या आठ महिन्यांत इस्रोच्या सर्व रॉकेटची प्रक्षेपणे थांबविण्यात आली होती. जीएसएलव्हीच्या आगामी मोहिमेतून

इस्रो प्रक्षेपणांची शृंखला पुन्हा सुरू करण्याच्या प्रयत्नात आहे.

यापूर्वी जीसॅट १ या उपग्रहाचे १२ ऑगस्ट २०२१ रोजी झालेले उड्डाण क्रायोजेनिक इंजिनातील बिघाडामुळे अयशस्वी ठरले होते.