Saudi Arabia Haj Yatra: सौदी अरेबियातील मक्का येथे हजसाठी गेलेल्या 98 भारतीयांचा मृत्यू झाला आहे. भारतीय परराष्ट्र मंत्रालयाने याला दुजोरा दिला आहे. परराष्ट्र मंत्रालयाने शुक्रवारी सांगितले की, यावर्षी भारतातून 1 लाख 75 हजार लोक हजसाठी मक्केला गेले आहेत. त्यापैकी 98 जणांचा मृत्यू झाला आहे. हे मृत्यू नैसर्गिक कारणांमुळे, आजार आणि वृद्धापकाळामुळे झाल्याचे मंत्रालयाने म्हटले आहे. त्यापैकी 6 जणांचा अराफातच्या दिवशी मृत्यू झाला तर 4 जणांचा अपघाती मृत्यू झाला.
परराष्ट्र मंत्रालयाने दिलेल्या माहितीनुसार, आमचे हज मिशन मक्कामध्ये काम करत आहे. प्रवाशांसाठी सर्व व्यवस्था करण्यात आली आहे. या प्रकारच्या अपघातावर आम्ही तातडीने कारवाई करतो. प्रत्येकाची काळजी घेतली जातेय. गेल्या वर्षी हज यात्रेदरम्यान भारतातील 187 हज यात्रेकरुंचा मृत्यू झाला होता.
सौदी अरेबियात यंदाच्या कडक उष्णतेमुळे हज यात्रेदरम्यान जगभरातील 900 हून अधिक हज यात्रेकरुंचा मृत्यू झाला. सौदी अरेबियाच्या सरकारी टेलिव्हिजनने सांगितले की, मक्काच्या मस्जिद-ए-हराममध्ये सोमवारी तापमान 51.8 अंश सेल्सिअसवर पोहोचले. वाढत्या तापमानामुळे आणि कडक उन्हामुळे यात्रेकरुंना अनेक समस्यांना सामोरे जावे लागत आहे.
दरम्यान, हज यात्रेला जाण्यापूर्वी यात्रेकरुंना करारावर स्वाक्षरी करावी लागते. ज्यामध्ये असे लिहिलेले असते की, हज करताना सौदी अरेबियाच्या भूमीवर कोणत्याही कारणांनी यात्रेकरुचा मृत्यू झाला तर त्याचा मृतदेह तिथेच दफन करण्यात येईल. मृतदेह परत पाठवला जात नाही. कुटुंबीयांकडून मृतदेह परत करण्याचा दावा केला जात असला तरी सौदी अरेबिया सरकार ते मान्य करत नाही.
नुकताच वर्ल्ड हेल्थ ऑर्गनायझेशनचा प्रखर उष्णतेबाबतचा रिपोर्ट समोर आला आहे. जगात उष्णतेमुळे दरवर्षी किमान पाच लाख लोकांचा मृत्यू होतो, असे या रिपोर्टमध्ये म्हटले आहे. तथापि, आरोग्य एजन्सीने असाही इशारा दिला होता की वास्तविक मृतांची संख्या अनेक पटींनी वाढू शकते. सौदी अरेबियाने हज यात्रेदरम्यान उष्णतेमुळे झालेल्या मृत्यूंबाबत कोणतेही भाष्य केलेले नाही. तथापि, अनेक मुस्लिम देशांनी त्यांच्या देशातील हज यात्रेकरुंच्या मृत्यूसाठी तीव्र उष्णता आणि उष्णतेच्या लाटेला थेट जबाबदार धरले आहे.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.