न्यूझीलंडविरूध्दच्या वनडे मालिकेसाठी टीम इंडियाची घोषणा! शुभमन गिलचं कमबॅक; हार्दिक-बुमराहला विश्रांती, पाहा संपूर्ण संघ

नवीन वर्षातील पहिल्या महत्त्वाच्या एकदिवसीय मालिकेसाठी भारतीय क्रिकेट नियामक मंडळाने (BCCI) भारतीय संघाची अधिकृत घोषणा केली आहे. कर्णधार शुभमन गिलचे पुनरागमन झाले असून, त्याच्याकडेच या मालिकेचे नेतृत्व सोपवण्यात आले आहे. मात्र, स्टार अष्टपैलू हार्दिक पांड्या आणि वेगवान गोलंदाज जसप्रीत बुमराह यांना या दौऱ्यासाठी संघात स्थान मिळालेले नाही.

शुभमन गिलकडे कर्णधारपद, श्रेयस अय्यर उपकर्णधार

गेल्या काही काळापासून विश्रांतीवर असलेल्या शुभमन गिलने संघात पुनरागमन करत थेट नेतृत्वाची जबाबदारी स्वीकारली आहे. बीसीसीआयने आगामी विश्वचषकाची रणनीती लक्षात घेता गिलवर विश्वास दाखवला आहे. त्याला साथ देण्यासाठी मधल्या फळीतील भरवशाचा फलंदाज श्रेयस अय्यरची उपकर्णधार म्हणून नियुक्ती करण्यात आली आहे. या निर्णयामुळे भविष्यातील नेतृत्वाचे संकेत निवड समितीने दिले आहेत.

हार्दिक-बुमराहची अनुपस्थिती

या मालिकेसाठी जसप्रीत बुमराह आणि हार्दिक पांड्या यांसारख्या वरिष्ठ खेळाडूंना विश्रांती देण्यात आली आहे. त्यांच्या अनुपस्थितीत वेगवान गोलंदाजीची धुरा मोहम्मद सिराज, प्रसिद्ध कृष्णा आणि युवा हर्षित राणा यांच्या खांद्यावर असेल.

अर्शदीप सिंगलाही संघात स्थान मिळाले असून, नितीश कुमार रेड्डीच्या रूपात एका नवीन अष्टपैलू पर्यायाला संधी देण्यात आली आहे. फिरकी विभागाचे नेतृत्व अनुभवी रवींद्र जडेजा आणि कुलदीप यादव यांच्याकडे असेल.

फलंदाजीमध्ये दिग्गजांची साथ

जरी नेतृत्व युवा खेळाडूकडे असले, तरी संघात रोहित शर्मा आणि विराट कोहली यांसारख्या दिग्गज फलंदाजांचा समावेश आहे. यामुळे संघाची फलंदाजी अधिक भक्कम झाली आहे. यष्टीरक्षणाची जबाबदारी केएल राहुल आणि ऋषभ पंत या दोघांवर असेल, तर सलामीसाठी यशस्वी जयस्वाल आणि ऋतुराज गायकवाड यांच्यात चुरस पाहायला मिळेल. वॉशिंग्टन सुंदरला अष्टपैलू म्हणून संघात स्थान मिळाले आहे.

न्यूझीलंड मालिकेसाठी भारतीय वनडे संघ

शुभमन गिल (कर्णधार), रोहित शर्मा, विराट कोहली, यशस्वी जैस्वाल, श्रेयस अय्यर (उपकर्णधार)*, केएल राहुल (यष्टीरक्षक), ऋषभ पंत (यष्टीरक्षक), रवींद्र जडेजा, वॉशिंग्टन सुंदर, कुलदीप यादव, मोहम्मद सिराज, अर्शदीप सिंग, हर्षित राणा, प्रसिद्ध कृष्णा, नितीश कुमार रेड्डी.