भारताने पाकिस्तानला पुन्हा दिला मोठा झटका! 23 जूनपर्यंत हवाई क्षेत्र केले बंद

भारताने पुन्हा एकदा पाकड्यांना दणका दिला. भारत पाकिस्तानला धडा शिकवण्याची कोणतीही संधी सोडत नाहीये. भारत सरकारने पाकिस्तानी विमानांसाठी आपले हवाई क्षेत्र 23 जूनपर्यंत बंद केले. यापूर्वी, पाकिस्तानसोबत वाढत्या तणावादरम्यान सरकारने 23 मे 2025 पर्यंत NOTAM जारी केले होते. नागरी विमान वाहतूक मंत्रालयाने सांगितले की, पाकिस्तानी प्रवासी विमाने आणि लष्करी विमाने भारतीय हवाई क्षेत्रात प्रवेश करु शकणार नाहीत.

पहलगाम दहशतवादी हल्ल्याच्या पार्श्वभूमीवर भारताने (India) 22 एप्रिल रोजी पाकिस्तानी विमान कंपन्यांसाठी आपले हवाई क्षेत्र बंद केले होते. पहलगाम दहशतवादी हल्ल्यात निष्पाप 26 पर्यटकांचा मृत्यू झाला होता. यानंतर, भारताने ऑपरेशन सिंदूर अंतर्गत दहशतवाद्यांच्या तळांसोबत पाकिस्तानी लष्कराच्या तळांनाही टार्गेट केले होते.

पाकिस्ताननेही 24 जूनपर्यंत नोटाम जारी केला

पाकिस्तान (Pakistan) विमानतळ प्राधिकरणाने जारी केलेल्या नवीन NOTAM (नोटिस टू एअरमेन) नुसार, शुक्रवारी पाकिस्तानने भारतीय विमानांसाठी आपले हवाई क्षेत्र 24 जूनपर्यंत बंद केले. पाकिस्तान विमानतळ प्राधिकरणाने सांगितले की, पाकिस्तानच्या हवाई हद्दीवरुन उड्डाण करणाऱ्या भारतीय विमानांवरील बंदी 24 जून 2025 रोजी पहाटे 4:59 वाजेपर्यंत वाढवण्यात आली आहे. भारतात नोंदणीकृत, संचालित, मालकीचे किंवा भाड्याने घेतलेले सर्व विमान या बंदीखाली राहतील, असे पीएएच्या निवेदनात म्हटले.

तसेच, ही बंदी भारतीय लष्करी विमानांनाही लागू होईल, असेही निवेदनात म्हटले. भारतीय विमान कंपन्या किंवा ऑपरेटर्सद्वारे चालवल्या जाणाऱ्या कोणत्याही विमानांना पाकिस्तानी हवाई हद्दीचा वापर करण्याची परवानगी दिली जाणार नाही.

बुधवारी पाकिस्तानने 'हे' लज्जास्पद कृत्य केले

बुधवारी इंडिगो विमानाला गारपिटीचा सामना करावा लागला होता. वैमानिकाने लाहोर एअर ट्रॅफिक कंट्रोलकडून पाकिस्तानवरील हवाई क्षेत्राचा वापर करण्यासाठी काही काळासाठी परवानगी मागितली होती. मात्र नंतर ती विनंती नाकारण्यात आली. तृणमूल काँग्रेसच्या खासदारांसह 220 हून अधिक लोकांसह विमानाला अचानक गारपिटीचा सामना करावा लागला. यामुळे विमानाच्या पुढच्या भागाचेही नुकसान झाले.