IIIT लखनऊमधील विद्यार्थ्याला मिळाले तब्बल 1.2 कोटींचे पॅकेज

इंडियन इन्स्टिट्यूट ऑफ इन्फॉर्मेशन टेक्नॉलॉजी (IIIT), लखनऊमधील अभिजीत द्विवेदी या विद्यार्थ्याने वार्षिक तब्बल 1.2 कोटी रुपयांचे पॅकेज मिळाले आहे. एवढे मोठे पॅकेज मिळवणारा तो आयआयआयटी लखनऊमधील पहिला विद्यार्थी ठरला आहे. या वार्षिक पॅकेजसह त्याने मागील सर्व प्लेसमेंट रेकॉर्ड तोडले आहेत. (IIIT Lucknow student bags 1.2 crore package from amazon)

टाईम्स ऑफ इंडियाच्या वृत्तानुसार, अभिजीत द्विवेदी (Abhijeet Dwivedi) यांची आयर्लंडमधील डब्लिन येथे अ‍ॅमेझॉनमध्ये (Amazon) सॉफ्टवेअर डेव्हलपमेंट अभियंता म्हणून निवड झाली आहे. अभिजीत माहिती तंत्रज्ञानाचे शिक्षण घेत आहे. सध्या तो बी. टेकच्या (B. Tech) शेवटच्या वर्षाला आहे. सॉफ्ट स्किल्समुळे त्याला मुलाखतीमध्ये यश मिळण्यास मदत झाली, असे त्याचे म्हणणे आहे.

अभिजीतने याबाबत सांगितले की, मुलाखतीसाठी स्वत:ला तयार करण्यासाठी मी अनेक व्हिडीओ पाहिले. सॉफ्ट स्किल्स खूप महत्त्वाचे आहेत. त्यामुळे अभियांत्रिकी पदवीधरांनी असा विचार करू नये की त्यांना फक्त तांत्रिक ज्ञानाची गरज आहे. संवाद कोशल्य आणि देहबोलीही तितकीच महत्त्वाची आहे.

आयआयआयटी लखनऊसाठी (Lucknow) हे एक जबरदस्त वर्ष आहे. अनेक विद्यार्थ्याना (Students) चांगले पॅकेज मिळाले आहे, तर 12 विद्यार्थ्यांची उच्च शिक्षणासाठी निवड झाली आहे.