Bus And Tanker Collision On NH-63: राष्ट्रीय महामार्ग 63 वर अंकोला शहराजवळ एक भीषण अपघाताची घटना समोर आली, ज्यात टँकर आणि कर्नाटक परिवहन मंडळाच्या (KSRTC) बसची समोरासमोर धडक झाली. या अपघातात दोन जणांचा जागीच मृत्यू झाला असून बसमधील पाच प्रवासी गंभीर जखमी झाले आहेत. या घटनेमुळे महामार्गावरील वाहतूक काही काळासाठी ठप्प झाली.
मिळालेल्या माहितीनुसार, हा अपघात (Accident) गुरुवारी (18 सप्टेंबर) दुपारी झाला. अंकोलाहून हुबळीच्या दिशेने एक टँकर जात होता, तर त्याचवेळी समोरुन कर्नाटक परिवहन मंडळाची बस येत होती. अचानक दोन्ही वाहनांची समोरासमोर धडक झाली. ही धडक इतकी जोरदार होती की, टँकरचा दर्शनी भाग पूर्णपणे चक्काचूर झाला, तर बसचेही मोठे नुकसान झाले. अपघाताचा आवाज इतका भयानक होता की, आजूबाजूच्या परिसरातील लोक लगेचच घटनास्थळी धावले.
दरम्यान, या भीषण अपघातात दोन व्यक्तींचा जागीच मृत्यू झाला. मृतांमध्ये टँकरच्या चालकाचा आणि बसमधील एक प्रवासी भास्कर पांडुरंग गावकर यांचा समावेश आहे. गावकर हे अंकोला केनी येथील रहिवासी होते. अचानक घडलेल्या या दुर्घटनेमुळे त्यांच्या कुटुंबावर शोककळा पसरली. अपघातात बसमधील (Bus) पाच प्रवासी गंभीर जखमी झाले आहेत. त्यांना तातडीने 108 रुग्णवाहिकेतून जवळच्या सरकारी रुग्णालयात उपचारासाठी हलवण्यात आले आहे. जखमींवर डॉक्टरांची एक टीम उपचार करत असून त्यांची प्रकृती चिंताजनक असल्याचे सांगण्यात येत आहे.
दुसरीकडे, अपघाताची माहिती मिळताच अंकोला पोलीस घटनास्थळी दाखल झाले. त्यांनी तात्काळ परिस्थिती नियंत्रणात आणली. वाहतूक कोंडी टाळण्यासाठी महामार्गावरील वाहतूक थांबवण्यात आली आणि एका बाजूने वाहने वळवण्यात आली. दरम्यान, पोलिसांनी पंचनामा करुन अपघाताची नोंद केली. अपघाताचे नेमके कारण शोधण्यासाठी पोलिसांनी तपास सुरु केला आहे. प्राथमिक माहितीनुसार, अपघाताचे कारण अतिवेगाने वाहन चालवणे किंवा एखाद्या वाहनचालकाचे नियंत्रण सुटणे असू शकते. मात्र, पोलीस तपासानंतरच नेमके कारण स्पष्ट होईल.
राष्ट्रीय महामार्ग 63 या वर्दळीच्या मार्गावर अवजड वाहनांची मोठी वाहतूक असते, त्यामुळे येथे वारंवार असे अपघात घडतात. आजच्या घटनेमुळे पुन्हा एकदा या महामार्गावरील सुरक्षा व्यवस्थेवर प्रश्नचिन्ह निर्माण झाले आहे. स्थानिकांच्या मते, या महामार्गावर सुरक्षाविषयक उपाययोजना अधिक कडक करण्याची गरज आहे.
दुसरीकडे, या अपघातामुळे प्रशासनावर तातडीने उपाययोजना करण्यासाठी दबाव वाढला आहे. या घटनेची नोंद अंकोला पोलीस ठाण्यात करण्यात आली असून पुढील तपास सुरु आहे. पोलिसांनी मृतांचे मृतदेह पोस्टमार्टमसाठी पाठवले आहेत आणि त्यांच्या कुटुंबीयांनाही कळवण्यात आले आहे. या दुःखद घटनेने अंकोला परिसरात हळहळ व्यक्त केली जात असून पोलीस या प्रकरणातील पुढील कायदेशीर कारवाई करत आहेत.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.