Himachal Pradesh Landslide: हिमाचलमध्ये भीषण अपघात! चालत्या सुमोवर कोसळली दरड; 13 प्रवाशांचा दुर्दैवी मृत्यू

Himachal Pradesh Accident News: हिमाचल प्रदेशातील लाहोल-स्पीती जिल्ह्यातून एक अत्यंत धडकी भरवणारी बातमी समोर आली. पांगी-उदयपूर मार्गावरील कुडूनालाजवळ एका चालत्या टाटा सुमोवर अचानक मोठी दरड कोसळल्याने भीषण अपघात झाला. या दुर्दैवी घटनेत 13 जणांचा जागीच मृत्यू झाला असून दोन जण गंभीर जखमी झाले आहेत. लाहोल-स्पीती पोलीस प्रशासनाने या अपघाताला अधिकृत दुजोरा दिला असून, मदत आणि बचाव कार्य वेगाने सुरु केले.

मिळालेल्या माहितीनुसार, भूस्खलनामुळे उदयपूर-किलाड रस्ता गुरुवारी बंद झाला होता. रस्ता बंद असल्यामुळे सर्व प्रवासी तिंदी भागात थांबले होते. शुक्रवारी रस्ता मोकळा झाल्यानंतर प्रवाशांना घेऊन ही गाडी पांगीच्या दिशेने रवाना झाली होती. मात्र, लाहोल खोऱ्यापासून सुमारे 60 ते 70 किलोमीटर अंतरावर असलेल्या कुडूनालाजवळ पोहोचताच, अचानक डोंगराचा मोठा भाग खचला आणि तो थेट चालत्या गाडीवर येऊन कोसळला.

दुसरीकडे, घटनेची माहिती मिळताच लाहोल-स्पीती पोलिसांचे पथक आणि स्थानिक बचाव दलाने तातडीने घटनास्थळी धाव घेतली. ढिगाऱ्याखालून एका जखमी व्यक्तीला सुखरुप बाहेर काढून तातडीने उपचारासाठी रुग्णालयात दाखल करण्यात आले. या अपघातातील (Accident) बहुतांश मृत आणि जखमी हे चंबा जिल्ह्यातील रहिवासी असल्याचे सांगण्यात येत आहे. भरमौरचे आमदार जनक राज यांनी चंबा आणि लाहोल-स्पीतीचे जिल्हाधिकारी यांच्याशी संपर्क साधून बचाव कार्यात अधिक गती आणण्याची विनंती केली.

सध्या पोलीस, आपत्ती व्यवस्थापन पथक आणि स्थानिक नागरिक घटनास्थळी ढिगारा हटवून इतर प्रवाशांचा शोध घेत आहेत. बचाव कार्य पूर्ण झाल्यानंतरच मृतांची आणि एकूण प्रवाशांची अधिकृत माहिती स्पष्ट होईल, असे प्रशासनाकडून सांगण्यात आले. या घटनेमुळे हिमाचल प्रदेशात शोककळा पसरली आहे.